WILLEMSTAD.- Ayera pa di tantísimo biaha a bolbe kibra na depósito di vürwèrk mihó konosí komo “Kruithuis”.

Alrededor di sinku pa shete di mainta, Sentral di Polis a risibí informashon ku tabatin un kiebro na e depósito unda ta almasená pòlbu na Brievengat.

Djis un ratu despues a drenta un otro yamada, indikando ku den bisindario di un hòfi na Jongbloed, algun hòmber lo tabata sakando kahanan for di un vehíkulo i hinka den algun otro. Polis mesora a bai na e sitio, pero no a topa nada partikular. Kontinuando ku nan investigashon, algun minüt despues nan a topa riba Gosieweg un di e vehíkulonan ku ta kuadra ku e deskripshon ku un ratu promé Sentral di Polis a duna. Despues di no a sigui òrdu di polis pa para, a inisiá un persekushon tras di e vehíkulo aki i den Rancho e vèn aki a aksidentá. E dos sospechosonan okupante a baha for di e vèn i trata na sigui nan huida na pia. Pero polis a logra pone man riba ámbos i detené nan. Ta trata di e hòmbernan sospechoso H.L.T.C. i P.R.C. di respektivamente 31 i 43 aña di edat, ámbos nase na Kòrsou. Den e vèn, polis a topa un kantidat grandi di kahanan di vürwèrk, ku a keda konfiská.

For di investigashon na e depósito di pòlbu a resultá ku deskonosínan a kibra dos kandal i a bai ku un kantidat supstansial di kahanan di vürwèrk for di dos kònteiner.

EXTRA a komprondé for di e importadó sr. Gustavo Semeleer, ku e biaha aki atrobe e malechornan a bai ku vürwèrk nan di kategoria haltu ku ta wòrdu usa solamente pa shownan grandi. Lógikamente nan ta peligroso pa esnan ku no sa kon atendé ku nan. Tambe nan a bai ku kantidat di vürwèrk ku ya tabata destiná pa shownan pa e próksimo dianan.

A presentá e duo dilanti di un fiskal ouksiliar ku a ordená su enkarselamentu pendiente di mas investigashon.