WILLEMSTAD.- Kualke gobièrnu ku sinta pa e próksimo seis añanan lo tin di duna kontenido i ehekutá e programa di COHO (Caribisch Orgaan voor Hervorming en Ontwikkeling). E Organo Karibense pa Reforma i Desaroyo aki lo ta hinká den un bachi legal, e lo bira un lei di Reino, loke ta mara gobièrnunan pa kumpli kuné na bienestar di e komunidat di Kòrsou. Asina promé Minister di Kòrsou sr. Eugene Rhuggenaath a duna di konosé durante e enkuentro ku prensa di ayera mainta. T’asina ku Kòrsou i Hulanda a firma e akuerdo aki ku en prinsipio ta nifiká ku ta habri porta pa por risibí e di tres ‘tranche’ den kuadro di e sosten finansiero.

Di su parti Sekretario di Estado sr. Raymond Knops a deklará ku e akuerdo aki a ser negoshá pa adelanto di Kòrsou, pero mas importante ainda ku bista riba progreso di esnan mas vulnerabel i pober den komunidat.

E kolaborashon i akuerdo ta ser ankrá den un lei di Reino. E pakete mes di kolaborashon entre Kòrsou i Hulanda lo bai kana pareu ku e lei di Reino. Durashon di e akuerdo aki lo ta di seis (6) aña. Lo tin konsulta i buska sosten di Parlamento pa e programa aki i asina pa e por ser ehekutá den su totalidat. E ta algu ku lo por bira parti di e presupuesto di mas aña di gobièrnu. Segun sr. Rhuggenaath esei lo ta e mihó manera pa por sòru pa tin kontinuidat i keda mustra tambe riba e benefisionan pa pueblo di Kòrsou. I si for di awor mustra i proba kiko ta e resultadonan positivo ku lo sali for di e kolaborashon aki, outomátikamente komunidat mes lo sigui apoyá pa keda ehekutá un ke otro segun e programa.

Dokumento públiko?

Durante konferensia di prensa a surgi e pregunta: dikon e COHO aki no tin un karakter públiko, siendo ku esun anterior (CHE) si?

Sr. Rhuggenaath a splika ku e CHE ku a ser presentá na yüli tabata un dokumento ku di parti di Kòrsou no tabata di akuerdo kuné i e tempu ei a opta pa hasié gran parti di dje públiko pa sa dikon no ta di akuerdo.

A negoshá i a trese kambio den e konsepto. Pero e loke a firma ayera ta base pa ehekushon di e programa. Pues tin un akuerdo, loke ta nifiká ku e situashon ta kambia i komo tal e tin di pasa Raad van State i Parlamentonan promé ku e por bira públiko. Ainda Raad van State tin di duna su konseho i Parlamento tin di hañ’é, i ta e momentu ei lo por konsiderá pa e bira públiko. E COHO no por bira públiko ainda pa motibu ku e prosedura no ta permití esei. Tin un prosedura kon e leinan aki tin di kana. Tanten ku e yega Parlamento di Kòrsou e no ta un dokumento públiko.