WILLEMSTAD.- Kayanan di Kòrsou ta den hopi mal estado. Minister enkargá ku VVRP Zita Jesus Leito a haña basta krítika pa esaki i e ta konsiente di dje pero si no tin plaka no por drecha kaya.

Den entrevista ku minister demishonario Zita Jesus Leito el a bisa EXTRA ku ora el a bira minister tabatin Wegenfonds, un entrada di 38 pa 40 mion i p’esei e gobièrnu anterior tabatin hopi plaka pa por drecha i mantené kaya. Kayanan di Kòrsou ta hopi bieu i nan mester keda drecha i mantené tambe pero ora el a sinta el a hañ’e ta ehekutá un desishon ku a keda tuma pa e gobièrnu di 2016, promé ku esun aktual ku a bisa ku ‘motorrijtuigen belasting’ no ta un “Bestemmings belasting” i p’esei mester a stòp kuné. Konsekuentemente no tabatin sèn pa Wegenfonds mas i konsekuentemente no tin plaka pa drecha ni mantené e kayanan bieu di Kòrsou.

Tempu di e wegenfonds tabatin plaka ta lora pa hasi i deshasí, pero or minister Zita Jesus a sinta e situashon a kambia. Si no tin plaka strukturalmente pa mantené e kayanan malu, drecha e kayanan malu rekonstruí e kayanan i mantené esnan ku ta basta bon, bo no ta yega niun kaminda.

“Awor aki nos tin temporadanan den 4 aña ku hopi áwaseru, e kayanan bieu ei, kada un skur ku bo a laga sin drecha ta yena ku awa. I esei ta pone ku e ta forma buraku poulatinamente, e awa ta koba bou di dje i ta bin burakunan. Si bo tin sèn bo ta duna enkargo mesora”, segun minister di VVRP.

E gobièrnu ku ta bahando aki a topa ku un maneho finansiero hopi stringente, a kuminsá ku destahonan, mester wak nan super bon, pero sòru pa tin e 3 oferta òf bin ku destaho públiko. Kosnan ta tarda masha hopi promé ku yega pa haña un desishon voral e parti finansiero.

Minister Jesus Leito ta bisa ku finansa ta algu sumamente importante den e totalidat aki i p'esei e ta kontentu ku Staten a bisa pa bin bek ku wegenfonds.

P’esei e pregunta ta, kon por tin maneho si no tin sèn pa esaki. “Mi tabatin maneho pero no por ehekutá maneho pasobra e maneho ta ku kaminda ta kibra tin di drecha nan i rekonstruí nan, esnan ku sker mantené nan. Den nos kaso kasi un 70% ta kamindanan òf ta hopi malu òf bayendo den direkshon di malu i mas ora a bin Covid ku a kaba di horka hende i tabata un proseso kaminda bo ta mira ku bo no tin sèn pa hasi nada mas”. E situashon di kayanan a bira di tal forma ku asta mester a kuminsá usa semènt pa wanta e situashon un poko.

“Kua minister ke algu asina aki, bo ta kere ami lo ke pa mi no por yena buraku i laga e kosnan bai asina i meskos ta konta pa limpiesa kantu di kaya, no tabatin sèn pa limpia kaya. Selikor a manda tur kontratista kas, ku ta esnan ku ta tene tur e kamindanan grandi i atendé i awor e trabou a kuminsá bek”.

Minister a sigui bisa ku na 2019 el a bin ku e proyekto di e Rollerbariernan esta e vangrailnan ku ta wanta e outo i evitá ku hende ta haña heridanan grave. Bunita proyekto pero tambe no tabatin sèn pa por a pone e tipo di vangrailnan aki mas kaminda.

Minister Zita Jesus Leito a bisa ku e ta karga su responsabilidat pero e no tabatin e mihó tempu pa hèndel ku e tipo di kosnan aki pa motibu di sèn.