WILLEMSTAD.- Pa fin di luna algu ménos ku  80 trahadó di Girobank lo haña nan retiro definitivo for di e banko. Banda di nan sesantia nan ta haña 3 luna di salario komo kompensashon.

Algu mas ku 30 trahadó lo sigui den servisio di Girobank pa traha riba terminashon di e operashonnan di Girobank. E entidat nobo ku a lanta pa manehá terminashon di e banko ta GI-RO Settlement Holding BV.

Banko Sentral huntu ku gobièrnu i GI-RO Settlement Holding N.V. a firma un akuerdo dediká spesífikamente na manehá i kobra e fiansanan pendiente di Girobank i usa e entradanan akí pa hasi pago na e depositantenan di Girobank. GI-RO Settlement  lo usa e sèn ku gobièrnu ta fia serka Hulanda pa por paga e depositantenan di Girobank nan saldo mas lihé posibel.

Ku e fiansa aki a paga saldo kompleto di gran mayoria di e mas ku 2000 depositantenan ku tin sèn ainda riba un kuenta bankario afektá pa e moratorio ku a drenta na vigor for di 2019. GI-RO Settlement lo usa e ingresonan ku e lo optené ku maneho i kobransa di e fiansanan di Girobank pa paga e fiansa di Hulanda bèk. Despues, si resta sufisiente fondo, GI-RO  lo hasi pago na e sobrá depositantenan tambe.