Pa komprondé unda nos ta para awe, mester sa for di unda nos ta bin

Konkurso skirbi pa konmemorá: Komishon Nashonal di UNESCO Curaçao, Fundashon NAAM, Plataforma di Sklabitut i Herensia di Sklabitut, Fundashon Biblioteka Nashonal Kòrsou, Fundashon Kas di Kultura huntu ku Ministerio di Enseñansa, Siensia, Kultura & Deporte ku koperashon di Sektor di Kultura & Deporte ta organisá un konkurso di skirbi titulá: ‘Bibando ku Libertat’. Esaki den kuadro di dia internashonal pa rekordá ruta transatlántiko di sklabitut i su abolishon kual nos ta rekordá 23 di ougùstùs próksimo.

Nifa Ansano, Max Elstak i Sue Girigorie a bai den

detaye di e konkurso di skibi aki ku Djasabra. Para dilanti di e estatua di lucha pa libertat na Rif, ku un brisa di laman suplando den nos tur su kara, a laga sinti e orguyo di esnan ku awe nos por ta liber. Nifa Ansano a konta ku dia 23 di ougùstùs lo tin un akshon kaminda ta pidi pueblo pa pensa, reflekshoná ku nan i esaki e pueblo lo mester hasi pa medio di un kuenta kòrtiku òf un poema ku mester skibi.

 

E idea….

Nifa a splika ku e idea ku nan tin abase di informashonnan di e luchanan ku nos a eksperensia den nos komunidat pa yega na libertat i abolishon di sklabitut. Si wak e lucha di 1795 tur hende sa ku e ta para pa igualdat, fraternidat i libertat pero kon ta bib’é awendia, kon ta bib’é ku libertat den 2019. I p’esei e kompetensia yama tambe, bibando ku libertat. E hendenan mester trese un kuenta kòrtiku, kaminda ta pone atenshon riba algun di e baluartenan, ku a sòru ku awe nos ta kaminda nos ta i ku nan a duna nan aporte, kon nan lo a eksperensia e Kòrsou di awendia. “Ta haña ku nan lucha tin balor? kon nan ta mira esaki”. Si kue Sablika por ehèmpel komo hende muhé, segun Nifa, kon e lo mira e hende muhé di awendia, e ta haña ku e hende muhé nan a bai dilanti di un forma ku el a pensa i ku el a hinka den su mente. Kon e ta mira esei, kon e ta eksperensi’é. I di bèrdat nos tin libertat, kon liber nos ta di bèrdat. Esei segun Nifa Ansano, pa nos djis para ketu na e situashon di awendia pero usando e balornan ku nos lidernan di ántes a usa, enkonekshon ku abolishon di sklabitut, unda nos ta para awe, kon nos ta bibando ku nos libertat.

 

Kompetensia abase e realidat di awe…

E idea pa yega na e kompetensia di skibimentu aki segun Nifa Ansano a kuminsá for di aña pasa ku e aktividat rondó di 23 di ougùstùs, kaminda a pidi hóbennan dialogá  ku adultonan, ku diariamente ta fungi pa duna informashon tokante di e tema. Pa por mira si realmente tin un gèp, ku e informashon ta yega i si nan ta interesá. I un di e puntonan ku a bin dilanti na e okashon ei ta, ku e hóbennan ta pidi pa usa kosnan ku ta biba mas den realidat pa involukrá nan tambe den e totalidat i for di esei a skohe pa e biaha aki bai hasi un konkurso, pasobra hopi bia hendenan ta bisa pa stòp di papia di e kos di sklabitut ei i p’esei no ta papia di sklabitut pero ta papia di awe i usa e balornan di ántes i einan e idea a lanta i sin lubidá loke bo a pasa aden pa a yega aki awe.


Hasi mas pa konosé nos historia….

Max Elstak ta konosedó di historia di Kòrsou i e tambe ta forma parti di e tim. El a splika Djasabra ku e no ta haña ku tin sufisiente konosementu riba e temporada di sklabitut i tampoko di abolishon di sklabitut. Max no ta haña ku ta hasiendo sufisiente tampoko pa nos hendenan por sa mas di e temporada di sklabitut i kiko e abolishon a trese kuné pa nos awendia. Si mira den e programa na skolnan e tema aki ta masha limitá i e konosementu di loke a pasa den pasado ta basta limitá i esaki historia general tambe. I spesífikamente si konsentrá riba sklabitut i e komersio transatlántiko i kiko el a nifiká atraves di tempu, no solamente pa Ulanda pero henter Oropa komo paisnan kolonisador, ta trese kuné ku nos no tin masha konosementu di dje. E fecha di 23 di ougùstùs, Max Elstak ta haña ku nos tin di konmemorá muchu mas. E ta un fecha ku un profundidat históriko profundo. E anochi/mardugá di 22 pa 23 di ougùstùs a sosodé algu ku a nifiká un kambio kompleto den historia di mundu. El a sosodé na Haiti i riba e anochi ei e hendenan a  bringa pa nan libertat i despues di algun aña a lanta e repúblika demokrátiko dirigí pa hende pretu. E ta algu transendental pasobra el a trese un  ruptura den e sistema kolonial ku tabatin e tempu ei.

Lucha pa libertat….

Meskos ku ta di lamentá ku e estatua di lucha pa libertat ku tin na Rif ta e úniko ku ta kòrda nos di e katibunan i kiko nan a nifiká pa nos pais. Max Elstak a bisa Djasabra ku si bai Venezuela, den kada estado ta mira un estatua di Simon Bolivar. I den e kaso aki e lucha di Tula i su kompañeronan dia 17 di ougùstùs ta trese kuné ku awe nos por papia riba sierto aspektonan di libertat, ounke nos no a yega ainda ei. E ta un marka emansipativo masha importante i a yega tempu pa tur e markanan aki pone den konteksto real den un pueblo ku ta kanando den direkshon ku un dia e mes por dirigí su pais.

 

Inisio di un proseso…

E abolishon na 1863, tur hende sa ku e no a nifiká abolishon total pa loke ta opreshon i limitashon, ekskluí hende di nan realidat, e no a nifiká esei pero e ta marka inisio di un proseso. Ta algu ku a medio di edukashon por fortalesé e proseso ei pa hende haña e sensashon kiko e libertat real ta. I kaminda e estatua di libertat ta, segun Max ta su lugá pasobra einan ta kaminda a kaba di ehekutá nos libertadónan, dilanti di Fort Amsterdam a transportá nan den yola den e awa pa eksponé nan riba staka na Rif i e restunan mortal tira na awa. E lugá ta bon pero mester yega ku na mas sitio ta bin un estatua na honor di nos héroenan.

 

Krea un konsenshi bibu….

Sue Girigorie di su parti a menshoná ku e organisashonnan ku ta sòru pa e kompetensia aki ta

Komishon Nashonal di UNESCO Curaçao, Fundashon NAAM, Plataforma di Sklabitut i Herensia di Sklabitut, Fundashon Biblioteka Nashonal Kòrsou, Fundashon Kas di Kultura huntu ku Ministerio di Enseñansa, Siensia, Kultura & Deporte ku koperashon di Sektor di Kultura & Deporte. No ta solamente pa rekordá i konmemorá so riba e fecha nan pero krea un konsenshi bibu serka bo komunidat pa nan ta konsiente di nan pasado. Hopi hende ora nan tende sklabitut ya nan a kai den pániko, pero si wak ku na 1863 legalmente a abolí sklabitut, pero a sigui ku e struktura te kuminsamentu di siglo 20, nos no ta masha leu di e akontesimentunan ei. Te awe por mira kon hende ta reakshoná riba sierto kosnan. ‘Mi no por krea niun futuro konsiente si mi no ta komprondé kaminda mi ta para awe’, asina Sue Girigorie a bisa Djasabra. Pa un hende komprondé unda e ta para awe, e mester komprondé for di unda e ta bin. Ta dikon mi ta awe manera mi ta komo pais i mi tin di bai bek, pa sigui padilanti. E kos ei ta krea un miedu di kisas loke nan ta bai haña pa dil kuné. Pero ora bai bek den pasado pa komprondé presente, e hende ta bira mas orguyoso di su hendenan i su pais, di loke a tuma lugá i ku awe nos por papia i kombersá liber. I esei ta nos forsa i esei plataforma ta para pe i e fundashonnan ku ta afiliá na e plataforma.

 

 

Reglanan di partisipashon Bibando ku Libertat…

E kompetensia ta konsistí di dos kategoria; kuenta kòrtiku i poema. Tur personanan di 18 aña bai ariba ku ta biba na Kòrsou por partisipá. Tur kuenta òf poema mester trata e tema bibando ku libertat saliendo for di e konteksto di abolishon di sklabitut i e ruta transatlántiko. Tur teksto mester ta na Papiamentu i original. E kuenta kòrtiku mester tin máksimo 750 palabra i poema no mas largu ku 32 liña. Por entregá teksto mas tardá 11 di ougùstùs via email: bibandokulibertat@gmail.com.

 

Premio:

E ganadónan máksimo di kada kategoria lo por partisipá grátis na e konkurso di skirbi di Wintertuin Curaçao na sèptèmber próksimo. E di dos finalista di kada kategoria lo risibí un Lenovo tab E7. E 3 mihó tekstonan di kada kategoria lo keda presentá durante e programa di 23 di ougùstùs na Biblioteka Nashonal Kòrsou. E 10 mihó tekstonan di kada kategoria lo keda publiká.


Publikashon ganadó:

Dia 17 di ougùstùs lo anunsiá e 10 mihó tekstonan. Durante di e programa di konmemorashon riba dia 23 di ougùstùs lo saka e ganadó máksimo.

Chèk página di facebook di e organisadónan pa sobra reglanan di partisipashon. Pa kualke pregunta òf mas informashon por tuma kontakto ku Nifa Ansano via whatsapp:+5999694 7587 òf bibandokulibertat@gmail.com.

 

 

 

 

SHARE

LEAVE A REPLY