Defensor di Pueblo:

WILLEMSTAD.- Gobièrnu di Kòrsou pa largu tempu kaba no ta kumpli ku su obligashon legal pa ahustá e penshun di behes (aov). Esaki tin konsekuensianan grandi pa prinsipalmente penshonadonan ku ta e grupo den komunidat ku e regulashonnan di aov ta aplikabel p’e. E aktuashon di gobiernu no ta kumpli tampoko ku normanan di bon gobernashon ku ta indiká ku gobièrnu mester ta konfiabel i mester tene su mes na lei.

Asina Defensor di Pueblo (”Ombudsman”) Keursly Concincion ta duna di konosé den un karta na e siudadano Stanley Bodok. Bodok dia promé di sèptèmber último a hasi un petishon por eskrito pa Defensor di Pueblo inisiá un investigashon riba aktuashon di gobièrnu a base di normanan di bon gobernashon. Esaki relashoná ku gobièrnu no ta kumpli ku su deber legal pa adaptá e penshun di behes.

Den su kontesta riba e petishon Concincion ta bisa ku for di informashon ku ta públiko por komprondé ku gobièrnu di Kòrsou pa basta tempu kaba no ta kumpli ku su obligashon legal pa ahustá e penshun di behes. Esaki segun Defensor di Pueblo tin konsekuensianan grandi pa prinsipalmente penshonadonan. Mas aleu Defensor di Pueblo ta indiká ku for di e karta di minister di Finansa pa Parlamento fechá 21 di ougùstùs, por komprondé ku a lanta un grupo di trabou ministerial pa investigá e problemátika di aov, aparentemente pa yega na un solushon struktural.

Tambe por komprondé for di diferente otro fuente, Concincion ta sigui bisa, ku Parlamento di Kòrsou tambe tin atenshon pa e problemátika aki. Tumando tur esakinan na konsiderashon Defensor di Pueblo ta bisa di ta yega na e konklushon ku un investigashon di su parti (“ambsthalve”), kaminda ta yega na konklushonnan i ta duna rekomendashonnan kon pa atendé ku posibel aktuashon kontra normanan di bon gobernashon di parti di gobièrnu, no ta oportuno i lo no kontribuí na un solushon aselerá. Pa e motibu aki Concincion ta bisa di lo no honra e petishon pa e hasi un investigashon.