WILLEMSTAD. - Siman pasá Korte di Den Haag a kondená un hòmber YdK nasé na aña 1983 pa bendementu di kokaina den Zoetermeer. Durante su defensa a bin dilanti ku e loke ku mas a duele ta ku e no por a bai dera su ruman muhé apesar ku el a haña outorisashon di Direktor di prizòn pa e bai entiero.

Ministerio Públiko a pidi un kastigu di 6 luna pa e akusado.

Durante su defensa e abogado a pidi pa tene kuenta ku e siguiente sirkunstansianan. E sospechoso no por a asistí na e entiero di su ruman muhé ku a fayesé durante detenshon preventivo pa motibu di falta di personal den prizòn, miéntras ku el a risibí pèrmit di e direktor di prizòn. E echo ku e sospechoso no por a bisa su ruman muhé ayó tabata momentu hopi duru pa su persona. Banda di esei e abogado a splika korte ku su kliente a konfesá e echo i ke kuminsá traha ku su bida nobo den futuro. Simplemente e no por hasi esaki riba su mes. Apesar ku e akusado a kai den su periodo di prueba, e abogado a pidi pa dun’é un kastigu ku ta inkluí un parti kondishonal. Konforme su karchi di kastigu, el a risibí vários kondena den pasado di kua un di nan ta pa droga i tambe tin di infrakshon den tráfiko.Pa loke ta trata su bida, e ta un persona ku tin problema finansiero i tin basta debe. E ta den lei di uitkering i dia el a bai biba huntu ku un partner, a baha su uitkering. E tin  problema di kondukta  i e chèns di residivismo ta haltu. Pues e mester di guia di Reclassering pa e por sali for di e sírkulo visioso ku e ta aden.Reclassering ta konsehá tratamentu i pa esaki tuma lugá e tin di haña kastigu  kondishonal. Pero ta difísil pa duna un persona residivista kastigu kondishonal kaminda ku e ta faya den su periodo di prueba.Korte a yega na un desishon kaminda ku lo imponé 5 luna di prizòn, pero e parti kondishonal di e kastigu anterior ku ta kologá riba su kabes i ku lo mester keda ehekutá, lo no keda ehekutá pa e haña chèns pa sigui guia di Reclassering.Esei ta 220 dia, pero lo hasi esaki un aña pa e por kumpli ku Reclassering.Pues 5 luna pa e kastigu nobo i ta mantené e kastigu kondishonal anterior te na un aña pa e sigui guia di Reclassering.