WILLEMSTAD.-  Ayera Shairon Paulina (38) ku ta sintando un kastigu di bida largu, ta esun ku tabata na bùrt pa pidi Hof revisá su evaluashon di kastigu mirando ku e ta bai hasi 20 aña será.

Shairon Paulina a keda kondená na un kastigu di bida largu  dia ku e tabatin 18 aña.

El a keda akusá di a asesiná e víktima di fam Dunzand dia 18 di desèmber aña 2000 durante un “ happy Hour “ ku tabatin na Fort Waakzaamheid”.

E tribunal konsistí di e 3 huesnan mr. Hubben, mr. Carmelia i mr. Geurts- de Veld ta esnan ku ayera a inisiá e evaluashon.

Ayera un miembro di Reclassering i e trahadó sosial di SDKK tambe tabata presente durante tratamentu di e kaso.

Segun e miembro di Reclassering Paulina a kuminsá ku un proyekto di fundeshi te dak, pero debí ku no tin plaka pa finansiá e proyekto mester a stòp.

Segun su abogado mr Blonk nunka a kuminsá  ku e proseso di resosialisá ku Paulina.

Relashoná ku e situashon finansiero, tampoko por paga e guia sikológiko den prizòn.

Segun e trahadó sosial, Ministerio Públiko ta esun responsabel pa  pago di e guia sikológiko den prizòn. Abogado general Ministerio Públiko no ta responsabel pa e parti finansiero di sikólogonan den prizòn.

Tin 2 aña di retraso pa pago di e profeshonalnan den e instituto.

Segun e abogado mr Blonk, Paulina a keda 6 aña sera den Foba pa su seguridat.

E ta un hóben ku a kai será ku su 18 aña i no a haña e guia di resosialisashon den prizòn. Awor ku e tabata por, a  stòp tur e proyektonan pa motibu di e situashon finansiero.