WILLEMSTAD.- Sandals Resort e luna aki ta selebrá su promé aña di eksistensia na Kòrsou. CEO di Sandals Resort International, sr. Gebhard Rainer, ta bisa den un entrevista ku EXTRA ku Sandals ta hopi kontentu ku e promé aña na Kòrsou. Na su opinion Sandals a eksperensiá hopi bon koperashon ku gobièrnu i tambe ke sigui invertí den Kòrsou. “Ta nos intenshon pa gran parti di nos trahadó ta fo’i e isla mes. Pa haña sufisiente hende for di Kòrsou nos a invertí pa eduká nan. Lamentablemente den bes en kuando un trahadó despues di a haña guia for di Sandals ta opta pa bai traha na un otro lugá. Esaki ta fèrfelu pa nos, pero nos ke sigui traha ku yu’i Kòrsou komo trahadó den nos Resort, nos lo keda den kontakto ku gobièrnu tokante esaki pasobra turismo ta kresiendo. Mas hotèl i mas aerolínea ta biniendo na Kòrsou. Esaki ta algu positivo, pero na mesun momento ta nifiká ku lo tin mas tenshon riba merkado laboral.”
Manera ta konosí Rainer promé ku habrimentu di Sandals den yüni 2022 a sinta na mesa ku minister di Desaroyo Sosial, Labor i Bienestar Ruthmilda Larmonie-Cecilia. Rainer a splika ku 854 hende lokal ku konosementu i eksperensia a laborá na Sandals ora nan a habri porta.

Segun Rainer e echo ku Sandals a kuminsá na Kòrsou tabata un paso grandi pa e kompania. “Pero na nos opinion tambe pa Kòrsou. Nos a introdusí un nivel di turismo ku no a eksistí na Kòrsou. Komo konsekuensia hende a bishita Kòrsou den e último aña ku normalmente lo no bishita e pais ei. Esaki ta algu positivo pa Kòrsou tambe. Nos lo sigui ku esaki. Kantidat di turista ku a bin Sandals den e promé aña tabata bon, segun nos, pero nos lo purba atraé mas hende. Pa esaki ta importante ku lo tin sufisiente aerolínea bulando riba Kòrsou.”

PORTRET
CEO di Sandals sr. Gebhard Rainer.