Johidi Rog, hóben di 16 aña a bira fanátiko di krio di Orkidia. I por sierto awor tambe ta den tapara pa e forma parti di e klup di Orkidia. Probablemente e lo bira esun mas hóben den e klup. Orkidia ta mata ku ta saka flor. Tin un variedat di mas di 25 mil espesie di Orkidia. Pero Johidi por konta nos kon el a kuminsá kria Orkidia i dikon el a kuminsá dediká su mes na Orkidia.

Johidi ta bayendo skol aktualmente,  den 4 de VWO na Radulphus College i el a studia e Orkidia afondo. Johidi a konta Djasabra ku el a skohe pa kria Orkidia pasobra nan ta bunita i nan ta un reto pe. Esaki komo bo tin di atendé ku nan ku pasenshi i diferente na otro mata.  Johidi a bai den e direkshon di Orkidia dor di kuriosidat. El a kuminsá ku planta tomati pasobra e kier a sa kon tomati ta krese. El a wak riba Internet i a hasié. Dor di buska informashon, hasi su mes investigashon i ehekutá loke e ta lesa, ta kit’é for di sinta den kamber i ta deskonekt’é for di Internet tur ora. Johidi no ta riba ‘game’ i Internet pero e ta preferá na dediká su tempu na algu mas útil. El a splika Djasabra ku e ta gusta dediká su mes na planta berdura pero komo ta hasi hopi kalor, e matanan aki mester di hopi awa i e no tin asina tantu tempu debí na su skol pa dediká su mes na e berduranan, el a wanta un poko ku nan.

Johidi tambe ta kria Rosa pero e ta hañ’é poko difísil ya ku tin di muha e mata di rosa kada dia pasa i tambe ta hasi kalor na Kòrsou i ta hasié difísil pe kria. Tambe e tin Varen i segun Johidi mayoria di su Varennan e no a kumpra nan. E ta parti esnan ku e tin, saka un pida i hink’é den tera i dun’é hopi awa. Mester di bon tera, bon awa i bon vitamina. Pa Johidi bon tera no ta e tera normal di klei di Kòrsou. Tin kaminda ta kue tera di Kòrsou i benta den saku pero loke mester ta Potgrond pa benta den baki mata.

 

Bon tera

No ta simplemente kue e tera di bo kurá i planta mata. Pa Johidi mihó no usa tera di kurá sin mas. Den pòchi e tera lo primi bai ki ora dun’é awa i e ta bira duru i sofoká e raisnan. Mester pone ‘Kompost’ aden pa e bira mas lihé. Kompost ta un meskla trahá di mata putrí òf produktonan orgániko manera kaska di bakoba  òf sobrá di berdura, i e ta sòru retené awa i vitamina. Kon Johidi mes ta traha su propio kompost. El a splika ku e ta usa por ehèmpel kaska di bakoba, blachi bieu, mester di algu bèrdè i maron. Bèrdè ta manera berdura òf yerba bèrdè kòrtá i blachinan bieu, tambe kòfi (e kachikachi). Den kaso di uso di kòfi no tin di pone hopi pasobra kòfi ta ásido i meskos si ta alkalino e mata no ta apsorbé su vitamina bon.

Kon ta kria Orkidia

Orkidia mester di hopi atenshon. “Promé bo skohe pa kria Orkidia, bo mester sa kiko bo ke, kon bo tin di muh’é i ta na altura di bo por ku e muhamentu i e ‘verpotting’ di e mata aki”. Dependé kua tera usa, Orkidia no ta krese den tera normal pero na palu. E ta usa karbon i poko mos i pa e  medium ei e ta muha e Orkidianan dos biaha pa siman. Un biaha pa siman e ta duna nan vitamina spesial pa Orkidia i no otro vitamina. No muha e Orkidia di ariba pasobra e ta putri pero muha e tera. Por laba Orkidia pero esaki mester sosodé mainta tempran pa e seka sino e ta putri. Mihó duna e Orkidia awa mainta tempran. Si e ta pegá na palu e ta muha nan tur dia pa nan no deshidratá. E medium ku e ta traha pa e Orkidia sinta den su funshon ta pa tene awa i nada mas. I ta dor di e tipo di medium ei trahá di mos i karbon ta sòru ku no tin mester di muh’é tur dia.

Kresementu di Orkidia

Orkidia ta bai den medium i dun’é vitamina un biaha pa siman. Orkidia ta krese dor di vitamina hopi biaha na Ulanda i ta dura sigur 5 aña pa e krese di tal forma ku e por saka flor. E ta tuma hopi tempu pa saka flor. Sin flor e bendedó tin ku pone deskuento. Un Orkidia por biba pa semper basta atendé bon kuné. Tin kasi 30 mil sorto di Orkidia. Tin  por ehèmpel e “Phaleanopsis” esaki ora ta hasi friu e ta kuminsá saka stèngel a flor. E stèngel ta dura dos luna pa desaroyá i e botonnan ta dura 2 siman pa habri. Mas kayente ta e desaroyo ta bai mas lihé. Tin Orkidia pa friu i otro pa kayente. Johidi a menshoná e “dendrobium nobil”  ku mester di su sosiegu den wenter pa e por saka flor. Den wenter no ta duna e tipo di Orkidia ei awa. Ta kòrda e fertilisante i e awa i esei ta e sosiegu den wenter esta Winter Rest. Otro Orkidia difísil pa krese na Kòrsou òf den kayente ta e

“Miltonia”, Johidi a enfatisá pa Djasabra ku tur loke e ta bisa aki ta pe i su eksperensia.

Johidi a laga nos mira un Orkidia ku hopi biaha ta usa su flor pa traha bukètnan di kasamentu. E ‘Phaleanopsis’ sigur ta un di nan. E ta un flor grandi i ta floria hopi. El a mustra unu ku tin dos aña ta floria di e mesun stèngel. E stèngel ta bira hopi largu.


Kantidat di flor

Johidi a splika mas aleu ku Orkidia dependé su genétika por saka te un kantidat di flor.  Hende ta bezig ta diseñá Orkidianan ku ta floria mas tantu i tur ora manera e

‘Phaleanopsis’. E ‘Phaleanopsis’ manera esun ku e tin ta hende a “trahe” i no ta hañ’é ta krese di e forma aki den naturalesa. Den naturalesa por mira ku e ‘Phaleanopsis’ ta diferente. Na Kòrsou tin hopi hende ta kria Orkidia. Johidi ta den un grupo riba Facebook kaminda e hendenan ta kria Orkidia. E no ta na altura di hóbennan ku ta kria Orkidia.

Johidi tin aktualmente 2 aña den krio di mata. Tur informashon ku e por a haña di mata i en partikular awor aki di esun ku  e ta dediká su mes na dje ku ta Orkidia, el a pròp den su kabes i ku un fasilidat e por papia di dje.


Estudio di biologia

Johidi ta aktualmente den 4de VWO i ke studia biologia. Pa straño ku por ta parse e no ta bai den direkshon di hortikultura esta krio di mata pero lo bai mas den direkshon di bestia. Banda di mata tambe Johidi ta stima bestia. Asta kachó di kaya e ta kue bai kas kuné i dun’é mesun atenshon i amor ku esun ku ya ta na kas.

 

Nos pregunta; si tin hende tin gana di un pida Orkidia nan por aserká bu.

Johidi: No….(Hari) mi no ta regalá mi matanan.

Mi por stèk Orkidia?

Si bo ke stèk semper hasié ku “sympodial”. Kòrta tres pida :pseudabulbs” i bo mester di tres pida pa e mata tin energia sufisiente pa traha otro rais i yega na flor. Si krak e mata sin mas bo ta mat’é òf lag’é pa hende ku sa di esaki pa hasié. Meskos ku Hybrid den kaso di

Orkidia ta nifiká ku ta krusa dos Orkidia ku otro i asina ta haña kolónan, formanan i holó diferente. Esaki ta e tipo di Orkidia ku por haña na hende su kas so i no den naturalesa, ya ku ta matanan ku hende a traha. Pa krese Orkidia for di simia ta sumamente difísil i kompliká. Tur kos mester ta steril i pochinan bon

sera pa bakteria no drenta. Tin Orkidia ku holó i tin sin holó. Tin por ehèmpel Vanilla ku ta un Orkidia di kual nos ta usa su “bonchi” vanilla pa diferente kos di boka dushi. Esei ta e úniko ku hende ta usa tambe pa konsumí. Orkidia ta e tipo di mata ku ta saka flor di mas bieu ku ta eksistí.

Orkidia malu

Meskos ku hende ta bira malu, bestia ta bira malu Orkidia tambe por bira malu. Johidi a splika ku si e blachinan ku ta bon bèrdè òf si su forma di krese, esta su patronchi di kresementu ta kambia ta nifiká ku e ta malu. Por haña tur e informashonnan ei riba Internet.

Konseho

Duna bo matanan hopi awa, semper hasi investigashon di kiko bo ta hasiendo pa bo no hasié fout.

 

 

LAGA UN KOMENTARIO

Please enter your comment!
Please enter your name here