WILLEMSTAD.- Mashinnan nobo a yega Kòrsou i ya kaba por a tuma nota ku a instalá algun di nan. Ta 12 mashin nobo a yega pa Parking Authority Curaçao (PAC). Pa PAC esaki ta un invershon pa keda garantisá ku por duna e servisio na komunidat di Kòrsou. Promé ku eksistensia di PAC tabata práktikamente imposibel pa yega den Punda i Otrobanda i parker ku fasilidat. Ta bon konosí ku hendenan ku ta traha den sentro di siudat tabata para nan outo mas serka posibel i konsekuensia di esaki ta esnan ku ke kumpra algu mester a pasa doló di kabes. Pues mashinnan nobo ta nifiká mihó servisio na nos komunidat i asina ta sigui tene Punda i Otrobanda aksesibel.

George Strick direktor di operashon di PAC a splika EXTRA ku nan ta kontentu ku e mashinnan nobo tei i ku pronto nan ta spera yegada di mas mashin nobo. E gerente ta atmití ku tin algun problema chikitu ku komunikashon loke ta pone ku e mashinnan por faya na sierto momentu. E punto ta ku e server ta na Canada miéntras ku e téknikonan ta yu di tera aki na Kòrsou. Pero nada di esaki no ta stroba PAC di sigui hasi esfuerso pa duna mihó servisio.

PAC a tuma nota ku ketu bai un grupo di komersiante ta pretendé i insistí ku ta e mashinnan ta stroba kumpradó di bai kumpra den sentro di siudat. Ku esaki ta tapa bista pa e echo ku durante di hopi dékada kumpradónan no por a yega sentro di siudat fásil debí ku trahadónan tabata para nan outo hinter dia. Awendia sentro di siudat ta aksesibel. Pa PAC ta interesante pa komersiantenan pone atenshon na e motibu dikon realmente kumpradónan no ta haña kaminda pa sentro di siudat. Awendia tin Internet, i esei ta hasi mas difísil ku hende ta bai kumpra algu pa un preis ku hopi diferensia kompará ku loke e ta mira riba Internet. Awendia ta subi Internet i mira kuantu pa merkansia na tur e paisnan grandi ku ta produsí i rebendé paña i otro merkansia.

Tabatin reklamo ku PAC lo tin demasiado kliente ku abono i esei ta stroba hendenan ku ke parker un ratu. Segun PAC esei no ta kuadra pasobra basta tempu kaba ku PAC no a duna mas abono. Na Marichi tabatin 136 lugá di parker. A palabra ku ora ku konstrukshon di e hotèl kuminsá na Marichi ku PAC lo move pendiente pa gobièrnu pone un otro espasio disponibel. E idea tabata pa PAC haña e área for di Vigilante te Saint Tropez i Botica Juliana. PAC tin 380 lugá di parker kaminda 30-35% ta keda usá pa gobièrnu plùs esnan di abono i tambe esnan pa gobernador i otro instansianan. Awendia Waaigat ta yen durante oranan di trabou loke ta demostrá klaramente ku trahadónan ta parker einan. Esaki ta duna espasio na hendenan ku ke drenta sentro di siudat i kumpra algu.  Na Amsterdam ta kosta 7.50 euro pa parker un ora den sentro di siudat, na South Beach Miami i New York tambe ta preisnan grandi mester paga pa parker den sentro di siudat. Na Kòrsou ta 50 sèn pa mei ora i 1 florin a un ora.

PAC ta konsiente ku teknologia ta sigui desaroyá. Ta bini sistemanan via app etc, pero ya kaba a nota ku e plachi di number di Kòrsou no ta registrá bon manera esun na Ulanda. Posiblemente den futuro serkano lo por hasi mas.