Despues di entamá kaso kontra di Speedy:

WILLEMSTAD. - Siman pasá Korte Sivil a dikta fayo den un huisio sumario ku Global Metal N.V., ku tin bou di su maneho  Parking Authority Curaçao (PAC) a entamá kontra di Speedy Armored Division N.V (Speedy), ku e deseo pa kibra e kontrato ku nan tin ku Speedy. Anteriormente PAC a manda un karta pa Speedy ku nan ta terminá e akuerdo di trabou ku  nan tin ku otro, pero Speedy a nenga esaki i provoká PAC benta na un kaso hudisial kontra di nan. Mester indiká ku e provokashon a sali Speedy bon, pa motibu ku e veredikto su resultado ta kompletamente na fabor di Speedy.

Ta trata di un kontrato entre di PAC i Speedy ku ta datá for di 29 di mei 2013. Den e akuerdo aki Speedy lo sòru pa rekohé e plakanan di e mashinnan di kobra pa stashoná outo den Punda i Otrobanda. Na total tin 52 kaha i esaki mester sosodé 6 biaha pa siman, liber di djadumingunan.

E kontrato ta vigente pa 1 aña i si partidonan no indiká otro 6 luna promé ku e kontrato vense, e kontrato ta prolongá outomátikamente ku 3 aña.

Speedy ta kobra 7000 florin pa luna pa e trabou desplegá i pa aña e suma aki ta subi ku 5%.

E akuerdo a kue un otro rumbo ora ku dia 8 di òktober 2020, PAC a notifiká Speedy den un karta ku pa motibu di sirkunstansianan finansiero, nan ta obligá di pone un fin na e akuerdo  entrante 31 di òktober 2020. Speedy na su turno a kontestá, ku e akuerdo no por terminá manera PAC ta pone den su karta pa motibu ku esaki no ta kuadra ku e kondishonnan ku tin den e akuerdo.

Dia 6 di novèmber 2020 pa un motibu òf otro, PAC a manda Speedy un karta ku e petishon pa kontinuá ku e trabou, miéntras Speedy riba petishon di PAC a stòp ku e servisio pa un periodo, pero no muchu despues, Speedy a kontinuá ku e servisio na PAC. Partidonan despues a sinta na mesa i a yega na sierto palabrashonnan inkluso un montante ahustá ku PAC lo paga. Esaki tabata dia 9 di novèmber.

Dia 12 di novèmber 2020, PAC ta manda Speedy un akuerdo nobo pa keda firmá, kaminda ku PAC ta baha e suma di pago mensual na Speedy. Dia 10 di novèmber, Speedy ta kontesta negativo riba e karta aki.  Konsekuentemente dia 27 di yanüari 2021, PAC ta para tur afsprak ku nan tin ku Speedy i a pidi Speedy pa entregá yabi di tur e mashinnan na ofisina di nan abogado. Speedy ta nenga di entregá e yabinan i esaki a provoká un huisio sumario entamá kontra di Speedy.

PAC den nan defensa a trese dilanti ku Speedy no tabata kumpli ku e akuerdo, dor ku nan no tabata piki plaka di 52 mashin 6 biaha pa siman, pero di solamente 20 mashin. Nan mester konta e plaka i hasi depósito di esaki na banko, loke ku nan no tabata hasi tampoko.

Speedy ta nenga e akusashonnan i a bisa ku ta PAC tin hopi luna sin paga nan pa e servio ku nan ta duna PAC. Akinan Speedy a trese dilanti ku PAC tin debenan di 96.982 florin.

Despues ku hues a studia tur aspekto di e disputa i tambe a para ketu na e pruebanan ku Speedy a trese dilanti pa loke ta trata e pago pa luna, hues ta di opinion ku e loke ku Speedy a trese dilanti i ta pidi ta hustifiká.

Esaki a pone ku e desishon di Korte ta obligá PAC paga e suma di 96.982 florin i pa motibu ku e relashon di trabou ya no ta sano mas, e kontrato ku Speedy lo terminá dia 27 di yüli 2021, loke ta pone ku PAC mester kumpli ku 7.700 florin tur luna te ku e fecha di terminashon di e akuerdo.