WILLEMSTAD.- Paga bo but ta sigui ku ‘COVID speshal’. Na luna di òktober i novèmber 2020, Ministerio Públiko a bini ku e ‘COVID speshal’. Esaki tabata pa suavisá e kargo finansiero den komunidat pa motibu di desaroyonan rondó di COVID. Ku e COVID speshal tur hende ku but habrí por drenta un areglo di pago ku mínimo NAF 19,- i por paga e resto den 24 luna.

A petishon general Ministerio Públiko ta kontinuá ku e COVID speshal te ku 5 di mart 2021. Ta hasi un yamada urgente na tur persona ku ainda tin but habrí, pa bin paga esaki mas pronto posibel òf pa drenta den areglo di pago.

Por paga ku Maestro òf via Pagafasil. No ta tuma sèn kèsh. Evitá un situashon desagradabel, paga bo butnan habrí òf drenta un areglo di pago.

Ofisina di Paga bo But ta situá na Waaigat, pariba di ofisina di Curoil riba Abraham Chumaceiro Bulevar.

Orarionan di ofisina ta di djaluna pa djabièrnè di mitar di 8 di mainta pa mitar di 12 di mèrdia i di mitar di 2 di mèrdia pa mitar di 5 di atardi. Riba djabièrnè ofisina ta sera 4  or di atardi.