WILLEMSTAD. - Dia 12 di ougùstùs tras di lomba, Banko Sentral a saka un nota pa prensa pa alertá komunidat riba sirkulashon di biyetenan bankario falsu. Entretantu Banko Sentral tin algun di e biyetenan falsu den nan poder i a analisá e karakterístikanan. Tin biyete di 25 florin i 100 florin falsu den sirkulashon.

E loke ku Banko Sentral a konstatá, ta ku e numbernan seri di e biyetenan falsu ta meskos, esta 8257613310. Numbernan seri di un biyete válido, kada un tin su mes number. Pues na momentu di aseptá biyete nan, paga bon tinu riba e numbernan, pa motibu ku kada un biyete válido tin un number diferente.

Otro karakterístika ku por ta visibel ta e echo ku e kalidat di biyete ta mustra gastá, kaminda ku parti di e teksto ku tin riba e biyete no ta aparesé òf no ta lesabel.

Pa loke ta trata e biyete válido, tur teksto ta lesabel. Si esaki no ta e kaso, Banko Sentral su konseho ta pa no aseptá e biyete enkuestion.

E biyete nan falsu tin un koló diferente i esaki ta bisto serka e biyete nan di 100 florin.

E biyete nan di 100 florin válido tin un koló brùin i e eklipsenan riba e biyete i e blòkinan na rant di e biyete tin un koló “parelmoer”. (madreperla).

Riba e biyetenan falsu e kolónan aki tin un tinta hel. Pues na momentu di aseptá un biyete i esaki ta bisto ku e kolónan no ta e kolónan kustumbrá, ta rekomendabel pa no aseptá e biyete aki.

Otro karakterístika di e biyete nan falsu ta ku e liñanan estilo di ola ta pega riba un folio koló di oro i no ta riba e parti blanku. Esaki ta un indikashon ku e folio no ta original, pero lo a keda trese  despues riba e biyete.

Tin algun biyete ku no tin folio i ku no ta lombra, òf no tin un firma ariba.

Pa loke ta trata e lèternan ‘N’ i ‘A’, ora pone e biyete den lus, ta nèt riba otro. Banko Sentral ta indiká ku pa loke ta trata e karakterístika aki, e biyete nan ku nan a analisá, na algun okashon e biyete nan falsu e lèternan tambe ta nèt riba otro ora pone esaki den lus, pero tabatin  tambe ku nan no ta kai nèt riba otro. Pues mester paga bon tinu.

E kalidat di papel di e biyete nan ta sinti otro for di ora tené den man.

Na algun okashon e falsifikadó di moneda a kue biyete nan válido di un denominashon blek i a imprenta esaki di nobo riba un denominashon mas haltu. Esaki ta trese kuné ku e biyete nan falsifiká aki ta poseé di algun karakterístikanan outéntiko manera marka di awa (watermerk), gleternan parti patras di e biyete i e foli koló di otro.

P’esei Banko Sentral ta atvertí komunidat pa manera tin duda den un biyete no asento esaki.

Banko Sentral ta enfatisá ku niun hende ni tampoko instansia no tin mag di aseptá biyete falsu i ta urgi pa mesora notifiká polis riba esaki.

Esunnan ku keda hañá kulpabel den pagamentu ku biyete falsu por haña un kastigu di prizòn te ku un máksimo di 9 aña di prizòn.