WILLEMSTAD.- Ministerio di SOAW i Banko di Seguro Sosial ta anunsiá ku entrante promé yanüari 2026 e suma di penshun di behes (AOV) máksimo ta bira XCG 1.000.
E oumento di AOV di XCG 862 pa XCG 1.000 ta konta pa residentenan ku ta risibí un penshun kompleto di AOV.
E diferensia entre XCG 862 i XCG 1000, ku ta XCG 138, lo wòrdu paga durante e promé mitar di yanüari 2026. Esaki dor ku na momentu ku a tuma e desishon (19 di desèmber) ta nèt den e periodo ku SVB ya a manda e lista di pagonan pa bankonan kaba (16-20 desèmber) i teniendo kuenta ku dianan di fiesta, no tabata posibel pa prosesá e pago adishonal promé ku dia di 1 yanüari 2026.
Esaki lo a trese un tardansa den e pago di luna, ya ku e periodo ta muchu kòrtiku pa por a hasi tur e kambionan.
E lumpsum ta keda paga den dos parti. E fecha pa e promé pago di e lumpsum (XCG 1250) tambe ta den e promé mitar di yanüari próksimo. E otro mitar lo wòrdu paga den yanüari 2027.
SOAW i SVB ta spera riba komprenshon pa e situashon.