WILLEMSTAD. - Giovannie Decaster no ta kontra ku e shofùr di bùs ku ta bai di akuerdo pa pone steker riba nan bùs durante e kampaña pa elekshon. E loke ku si ta molestiá Decaster ta e suma miserabel ku e partido(nan) polítiko ta paga e shofùr di bùs ku ta kore henter dia ku su bùs i propagá e partidonan.

Giovannie Decaster di STO

Ta konosí ku durante kampaña polítiko pa bai elekshon, visibilidat ta sumamente importante. Tin partidonan polítiko klaramente no tin un presupuesto pa profilá komo tal, miéntras ku otronan ta bombardiá ku propaganda visual i asina trata di logra nan meta den e elekshon benidero.

Partidonan polítiko ta buskando tur forma kon pa profilá ku nan propagandanan i un di formanan ku mas i mas ta haña akohida ta pone steker riba glasnan di bùs patras.

Decaster di e Sindikato Transporte Optimalisá, ta haña remarkabel ku polítikonan ku tin nan boka yen di bienestar di e pueblo aki, tòg nan ta esun ku ta hasi mal uso di e debilidat di e grupito di shofùrnan di bùs i ta paga un suma miserabel di 150 florin pa luna.

Decaster a splika ku tur hende sa ku e situashon ku shofùrnan di bùs ta pasando aden na e momentunan aki, pa ku presensia di COVID-19 ta hopi penoso. Esaki ta pone ku kiko ku ta bo duna e shofùrnan di bùs, nan lo tuma. Pero si di bèrdat, e partido(nan) polítiko ta duna balor na e tipo di propaganda e bùs ta hasi pa nan, e ta di opinion ku e pago mester ta muchu mas mihó ku e miserabel 150 florin pa luna.

Ta konosí ku avisonan den korant ta kosta basta plaka pa dia i e partidonan ta skohe pa no bai korant i pone aviso riba bùs, asina grandi riba e glas patras pa solamente 150 florin pa luna, miéntras ku den un korant esei ta minimalmente 350 florin pa dia.

Esaki ta mal uso di e debilidat i nesesidat di e shofùr di bùs. Si en bèrdat e partido polítiko tin bienestar na pechu, anto nan paga un suma muchu mas haltu. Si ta ABC Busbedrijf nan lo a bai, ei nan lo mester paga muchu mas tantu.

Decsater ta splika ku ainda tin un tiki tempu i ta spera ku e partido(nan) polítiko ku ta hasiendo uso i ku tin plan di bai hasi uso di bùsnan pa kore ku nan propaganda di plak riba nan glas patras, pa balorá e shofùr di bùs i e propaganda ku nan lo haña i paga un suma muchu mas na drechi. Pa motibu ku Decaster ta floho pa kere ku esnan ku ta hasiendo uso di e bùsnan awor aki, no a hasi un sondeo pa nan sa kiko realmente un propaganda ta kosta riba un bùs.

Un biaha mas Decaster a splika ku e no ta kontra, pero e suma ta miserabel.

Giovannie Decaster di STO: