WILLEMSTAD. - Ministerio di SOAW ta partisipá ku pago di sosten laboral pa esnan ku ta kobrando esaki lo ta mañan dia 30 di desèmber. E fecha segun e skema di pago ta 7 di yanüari 2021 pero a disidí di paga mas trempan. E personanan ku tin kuenta na MCB lo kobra mañan mes i e personanan ku tin un kuenta na otro banko lo kobra 2 te 3 dia di trabou despues.

Pa loke ta trata pago di ònderstant e fecha segun e skema di pago ta 4 di yanüari 2021 pero a disidí di paga esaki dia 31 di desèmber. E pago ta tuma lugá den oranan di mainta.

Ministerio di SOAW ke konsientisá tur hende pa tene kuenta ku den desèmber ta risibí pago mas trempan ku normal, pero esei tin komo konsekuensia ku e siguiente pago ta dura mas largu pa risibié. Pa esnan ku ta risibí sosten laboral esaki ta 7 di febrüari 2021 i pa esnan ku ta risibí ònderstant, e fecha siguiente fecha ta 18 di yanüari 2021.

Ministerio di SOAW ta deseá pueblo di Kòrsou felis dianan di fiesta i un próspero aña nobo.

No tin bonus

Willemstad – E aña aki manera nos a informá na algun medio di komunikashon, risibidónan di ònderstant lo no risibí e bónùs di NAf. 100,-. For di dia e pandemia a kuminsá a disidí di duna e risibidónan di ònderstant un karchi di komestibel na rason di un mínimo di NAf. 150,- pa luna.

Pues de fakto e risibidó di ònderstant den e luna di desèmber aki por hasi mas gastu ku si ta e bónùs so e lo a risibí.

Ministerio di SOAW ta deseá henter pueblo di Kòrsou felis dianan di fiesta I tur kos bon den 2021.