WILLEMSTAD.- E diferente gastunan ku Maduro & Curiel’s a introdusí resientemente, e trese un konfushon den pueblo pero tambe a trese ku tin sierto empresa ta malusá di esaki i ta pone gastunan èkstra, kaminda esaki no mester ta. EXTRA a papia ku presidente direktor di Maduro & Curiel’s Bank Lionel (Chicu) Capriles kende a enfatisá riba medida ku nan lo tuma si e empresario tòg kobra èkstra, kaminda no mester ta e kaso.

Chicu Capriles a komentá riba e diferente reakshonnan e dianan aki, relashoná ku e gastunan èkstra ku MCB a introdusí. El a bisa ku e gastu òf e medida manera hopi ta yam’e, ta pasobra nan ta purba na kambia e uso di e branchnan di manera ku esaki no ta kongestioná, kaminda ta haña filanan largu innesesariamente. Ultimo lunanan segun sr. Capriles, kisas tambe pasobra nan a sera sierto filial, esaki a pone un preshon riba e filialnan ku tin, ku fila di kliente.

Den e kuadro aki a introdusí un Fee di 1% pa depósitonan den e filialnan di MCB i asina konsientisá e klientenan pa usa e otro sistemanan ku MCB tin manera e 24/7 ántes yamá Night Deposit ku no ta trese niun gastu adishonal kuné. Tambe por hasi e depósitonan fia di nan Bankomátikonan, loke ta skapa e empresario mes di para den rei, e kliente empresario ei mes tambe ta skapa tempu i ta aliviá e kongestionamentu den e filialnan.

“Nos ta lamentá den komunidat ku dor di loke bo hasi tin hopi medionan sosial ku tin sierto komersiante ku ta probechá di e situashon, dor di introdusí gastunan adishonal riba por ehèmpel nos servisio di Pagomátiko i esei nos ta atendiendo dor di saka nos mashinnan i nos no ta aseptá kaminda no tin gastu ku ta pretendé ku tin gastu i usa esei pa hisa nan mes preis, pa nan servisio. Nos no ta kobra niun fee na Pagomátiko i esei no ta kai den e kambionan ku nos a introdusí”, Chicu Capriles a enfatisá den entrevista ku EXTRA.