WILLEMSTAD.- Kòrsou, Aruba i St. Maarten lo partisipá na e reunion interparlamentario entre e 4 paisnan den Reino, Ipko, ku ta tuma lugá fin di sèptèmber awor na Den Haag. Asina a disidí den e reunion tripartit ku a tuma lugá resientemente na St. Maarten entre e presidentenan di parlamento di Kòrsou, Aruba i St. Maarten.

Komishon di Relashonnan den Reino di parlamento Hulandes a disidí ku ta kontinuá ku organisashon di e reunion di Ipko na sèptèmber awor, despues ku a posponé e reunion ku tabata planiá pa tuma lugá den luna di yüni. A posponé e reunion debí ku den mesun periodo a organisá un enkuentro di NATO na Den Haag ku partisipashon di hefenan di estado di mayoria pais na mundu. Sinembargo, den e proseso akí gobièrnu hulandes tambe a kai i a yama elekshon nobo ku ta tuma lugá na òktober awor.

Ta den e kuadro akí parlamento di Kòrsou a duna presidente di parlamento, Fergino Brownbill (MFK), e instrukshon pa durante e reunion tripartit na St. Maarten sondia kiko pensamentunan di St. Maarten i Aruba ta tokante partisipashon na Ipko. Dudanan pa no partisipá na Ipko ta elekshon na Hulanda. No tin sentido pa partisipá na e Ipko mirando ku djis despues un parlamento hulandes nobo ta tuma asiento i por disidí ku no ta adoptá kualke resolushon ku a aseptá durante e reunion di fin di sèptèmber.

Den e reunion tripartit ku a tuma lugá 30 di yüni na St. Maarten a yega tambe na palabrashonnan konkreto relashoná ku trayektonan parlamentario ku ta kanando, manera entre otro e proyekto di lei pa atendé ku disputa entre paisnan den Reino i formanan di kooperashon mas estrecho riba nivel parlamentario. Tambe a diskutí temanan manera eksplorashon di maneranan pa intensifiká kolaborashon den region na nivel parlamentario i mihó kolaborashon entre komishonnan fiho di e 3 parlamentonan di Kòrsou, Aruba i St. Maarten.

Presente na e reunion tabata presidente di parlamento di Kòrsou, Brownbill, presidente di parlamento di Aruba, Marlon Sneek i presidente di parlamento di St. Maarten, Sarah Wescot-Williams. Tur 3 presidente tabata asistí pa nan respektivo griffier di parlamento. Inisiativa pa e  reunion tripartit akí a bini di St. Maarten.

Den e invitashon presidente di parlamento di St. Maarten, Sarah Wescot-Williams, ta bisa ku mirando e elekshonnan resien na Kòrsou, Aruba i St. Maarten i tambe e desaroyonan polítiko na Hulanda, ta oportuno pa  e presidentenan di e parlamentonan di paisnan den Karibe bini huntu i deliberá riba tópikonan di interes pa e parlamentonan i paisnan. E invitashon pa e reunion tripartit ta sigui riba un invitashon previo di St. Maarten pa presidentenan di di parlamento di Kòrsou i Aruba ta presente na selebrashon di parlamento di St. Maarten na honor di Dia Internashonal di Parlamento.

Riba e mesun 30 di yüni, den oranan di anochi, Parlamento di St. Maarten a selebrá Dia Mundial di Parlamento huntu ku mandatarionan, dignatarionan i invitadonan. Durante e evento akí a reflekshoná riba e balor i ròl importante ku Parlamento tin den komunidat. Brownbill, por wak bèk riba un dia di trabou eksitoso.

Foto