WILLEMSTAD.- Minister di Desaroyo Sosial, Labor i Bienestar (SOAW) Hensley Koeiman djabièrnè último a duna sifranan tokante pakete di sosten ku su ministerio a duna. Den e periodo entre 15 di mart di e aña aki te 1e di desèmber den total 7.156 persona a apliká pa un sosten laboral na e ministerio di SOAW. Di esaki 5.756 petishon a keda aprobá, ku ta 80 porshento. A rechasá 975 petishon, den total 131 petishon ta den tratamentu i 294 petishon tabata inkompleto i ta wardando riba dokumentonan rekerí.
Den e mesun periodo 5.089 persona a indiká ku nan a pèrdè trabou despues di 15 di mart. Den total 2.067 persona a indiká ku nan a pèrdè trabou promé ku 15 di mart i tabata buska trabou.
SOAW for di 15 di mart a duna un montante basta grandi pa e pakete di sosten di e ministerio, ku ta sèn i karchi sosial. Den e periodo nan a paga 2.512 persona (promedio pa luna) un montante di 9.956.714 florin (9.9 mion). Ta trata di personanan ku a pèrdè trabou i ku a risibí un sosten laboral den forma efektivo. Banda di esei a paga 3.244 persona (promedio pa luna) un montante di 8.368.585 florin (8.3 mion). Ta toka persona ku a pèrdè trabou òf ta buska trabou í ku ta risibí un sosten den forma di un Karchi Sosial pa kompra di komestibel. Total di e kostonan pa e pakete di sosten ta: 18.325.229 florin (18.3 mion).
Den e mesun periodo ministerio di SOAW a paga un kantidat di persona di 8.195 den total 8.572.352 florin (8.5 mion). Ta trata di personanan ku ta kobra ònderstant i ku a risibí un sosten den forma di un karchi sosial pa kumpra komestibel. Den luna di aprel di e aña aki a duna un pakete di higiena na 7.182 persona ku ta kobra ònderstant. Esaki a kosta 700.000 florin.
E kantidat di hende ku ta kobra ònderstant dia 1e di desèmber tabata 8.195. Ku ta nifiká ku 3.716 a hasi petishon pa ònderstant entre 31 di mart i 1e di desèmber.
frida
E ta difisil di kere ku en berdat SOAW a duna tur e sosten ku nan ta menshona aki.Dikon e hopi hende ku no a hanja sosten di ningun tipo, ni sikiera nan a hanja un yamada of un mensahe ku nan no ta kualifika,nan NO a tende net net nada. Pakiko e hende ku no a tende ni hanja sosten no por a kualifika?Pesei mi NO ta kere e sifranan ku a wordu publika aki riba.
frida
Mi no ta duda ku a kosta 18 miyon fls. Pero unda e sen a bai dor ku tin miles di hende ku a perde trabou i no a hanja nada. Ke men: sen a bai algun kaminda pero no pa hende den gran nesesidat,ku no tin ningun ingreso dor ku nan a perde trabou despues di 15 di maart,i algun antes kaba i nan no tin pa mantene nan famianan.