WILLEMSTAD.- Panaderia Isa ta un panaderia ku por i ta kompetí ku panaderianan na nivel internashonal, ku ta duna hopi atenshon na e aspekto di higiena. Ta trata aki di un panaderia outomatisá i komputarisá unda niun hende no ta pone man riba niun produkto, sino te ora ku e pan Sali kla na final. Asina e direktor, sr. Jean Fayad, a duna di konosé na EXTRA ayera. E deklarashon di sr. Fayad a bini komo reakshon riba reklamo di un persona ku supuestamente lo kumpra un kipashi ku sushi aden.

Segun Fayad, el a tuma nota di e keho den algun medio di komunikashon, el a haña kontakto ku e persona en kuestion kende a bisa ku el a tira e pan afó kaba.

El a sigui bisa ku, Panaderia Isa ta un establesimentu ku tin mas ku 90 aña di eksistensia, ku un kantidat grandi di empleado (75) direkto i (100) indirekto. Isa ta e úniko panaderia ku tin sertifikado internashonal pa establesimentunan di kuminda. Ku e lisensia aki den man Isa por hasi entrega di pan na kompanianan rekonosé. Isa tin di pasa e prueba di sertifikashon tur aña i semper a alkansá puntuashonnan hopi haltu.

Segun sr. Fayad, panaderia Isa ta ful outomatisá  i komputarisá, pues tin un prosedura pa tur kos. El a hasi invershonnan grandi den sistemanan outomatisá i komputarisá ku ta hasi ku niun hende no ta mishi ku e pan sino te ora e ta kla pa ser repartí, pues na final. Kada produkto tin su reseta pre-programá.

E sistema ta asina sofistiká ku por kontrolá ken a traha e pan, e orario i e ingredientenan. Tur dia di nobo ta hasi esfuerso pa por trese pan di mihó kalidat ku tin riba merkado. Esei ta garantisá pueblo di Kòrsou ku e ta haña un produkto di kalidat. Su ariña ku ta bini for di Merka ta hinka den un silo, di tal manera seyá ku nada no por drenta den dje.

Pa loke ta e aspekto di higiena, den panaderia Isa tin diferente grupo di 8 persona enkargá ku limpiesa, ku instrukshon i produktonan spesial pa nan usa. Higiena personal den trabou ta hopi rígido.

Komo sifuera no ta basta, tres biaha pa siman tin un kompania di ‘pest control’ ku tambe ta enkargá ku otro parti di higiena. Panaderia Isa ta un panaderia ku pueblo por ta orguyoso di dje, segun sr. Fayad.