A deskubrí un skèr den kabes di e kibra ola na Sea Aquarium

WILLEMSTAD.- Panomara, e opservatorio bou di laman di Curaçao Sea Aquarium, a regresá ayera, un dia despues di su instalashon, temporalmente na su sitio original na Parera. Mainta tempran a deskubrí un skèr den kabes di e kibra ola na kua e opservatorio ta mará.

Djaweps mainta a tou e opservatorio pa Sea Aquarium, kaminda despues, segun e plan, a kuminsá baha e konstrukshon paso pa paso usando balast. Despues di deskubrí e skèr, a disidí di no sigui ku e proseso i di transportá e opservatorio bèk pa haf.

No tin indikashon ku Panomara mes a sufri daño. Sinembargo, den haf lo hasi un inspekshon profundo pa kontrolá esaki. Den e periodo benidero lo investigá e kibra ola pa determiná kua reparashonnan ta nesesario i ki ora por bolbe instalá e opservatorio.

“Naturalmente, esaki ta hopi lamentabel, spesialmente despues di un dia asina bunita manera ayera”, Steffen van Heijningen, bosero di Curaçao Sea Aquarium, ta bisa.

“Pero ku e proyekto aki nos ta literalmente inventando e wil. Nunka promé na ningun kaminda na mundu a hasi algu asina, i den un proseso asina bo ta topa ku situashonnan ku niun hende no por a premirá. Nos ke hasi e trabou bon i, prinsipalmente, na un manera sigur: Panomara mester por keda na su lugá pa desena di aña. I si tin un kos ku nos na Sea Aquarium ta, esei ta resiliente. E vishon ta firme, i nos lo traha duru pa drecha e situashon aki.” Asina ku tin mas informashon disponibel tokante e planifikashon, lo informá públiko.