Teatro KadaKen a produsí huntu ku VANTA, PAPIA pa Kòrsou. Teatro KadaKen ta konsiderá PAPIA un obra ku ta yuda nan realisá nan ambishon pa konta historia den un konteksto mas amplio, dor di krea historia den un kuadro históriko, sosial i kultural. E dos delaster obranan – MULA 2017 i Chakutoe 2019 –  a ser produsí for di e ambishon akí.  

Bou di palu den patio di Fleur de Marie eatery nos a sinta i papia ku e tim ku ta forma Vanta respektivamente Vernon Chatlein, Juan-Carlos Goilo i Amber Nijman. Nan ta na Kòrsou ku e obra PAPIA. Ta trata di un obra teatral ku ta un biahe musikal, poétiko i visual na orígen di Papiamentu.

 

18 presentashon na Ulanda….

Vernon; ‘Papia ta un obra poétiko visual, musikal di orígen di papiamentu, tur e influensianan ku papiamentu a pasa dor di dje i nos a trese esei na un forma teatral musikal interaktivo ku por trese  e historia ei. Nos ta sumamente kontentu ku nos por ta aki finalmente na Kòrsou, kasi 2 aña despues. El a keda desaroyá na Ulanda/Amsterdam i nos a tour den 18 presentashon na Ulanda. I e kurason ku nos a trahe pe, e mentalidat i pensamentu semper tabata un opsekio pa Kòrsou. E obra ta skibí pa Juan Carlos ku mayormente a hasi e estudio, i huntu nos a añadí e sobrá parti i yega na e produkto final”.

 

 

Juan Carlos a bisa ku ta huntu nan a yega na e idea aki, sintá ku otro den un lokal ta papia i e idea a lanta. El a bin dor di un wega, hungando ku e palabra. Nos a pensa ki proyekto nos por hasi huntu pasobra nan a traha obranan huntu, nan a hasi diferente produkto i nan ta hopi variá den nan kolaborashon. Nan a pensa si nan ke traha algu di nan mes, kiko lo bai hasi. Vernon a kuminsá papia di algu di idioma. Pero kiko? Idioma ta bin for di ora ta den barika, ta tende e awa ta zona, e kurason ta bati, e ritmo, e stèmnan papia ta e tono i esei ta kanto i ora kuminda komprondé esei e ta haña palabra. E tres elementonan ora nan a sinta papia ku otro nan a yega na e kos pa traha ariba. Nan a kuminsá ku e wega di Papia, i fo’i papia por saka hopi palabra; Pa, Papi, Papia i hopi mas.

 

Papi’é i komprondé…..

Amber ta esun di e  kanta, e ‘klemtoon’. Amber ta e kantante di e grupo, e ta skibi tambe tekstonan parti di e músika i loke e gusta di papiamentu ta ku e ‘klemtoon’ ta esensial pa nifikashon di e frase i hopi idioma no ta asina fuerte manera papiamentu. Por skibié pero ta masha importante kon ta papi’é. Esei ta nifiká ku tin hopi forsa den e forma di papia. Ta papi’é poko poko, fuerte, ku amor i esei ta fasinante di papiamentu. Ounke Amber no ta papia  papiamentu, kada bes e ta bira mas mihó pa e keda tende. Por siña un idioma si ta keda tende.

Diferente idioma inkorporá….

E obra a keda trahá na Ulanda i e base ta ulandes i papiamentu. Ta ulandes i papiamentu pero tin franses, ingles, spañó, portugues i asta un tiki gueni, idiomanan indígena. Nan a purba inkorporá tur e elementonan, e idiomanan ku a topa otro na Kòrsou i a kontribuí na e papiamentu. Por tende tur bèk i nan ta ansioso pa sa e reakshon. Aki na Kòrsou ta papia asina tantu idioma. Na Ulanda nan a bisa e públiko pa sinti e papiamentu. Na papiamentu ta usual ku ta brua idiomanan den otro i e no ta zona algu no natural, pero e públiko ulandes ta otro. Ta algun palabra ingles por tende, pero nan ta brua si tin mas idioma aden.

 

2 aña despues na Kòrsou…

E reakshon den e 2 aña ku e obra ta bezig ta varia. Den e aspekto di komprondé, e tradishon na Ulanda su teater ta ku nan mester komprondé i no sintié. I si nan no por komprondé nan ta pega. Pero e hendenan ku ta sintié ta bisa ku e kos aki ta fenomenal i e aspekto di e teatro kaminda tin tres elemento ku ta visual, proyekshonnan di pasado ta oudiovisual impaktante. E hendenan ta gusta esei i komo obra e ta fantástiko pa eksperensia. E aspekto di komprondé i sinti ta importante. Na Kòrsou no ta problema pasobra aki ta sintié i komprondé.

 

E obra….

E obra original na Ulanda tabata 1 ora mas òf ménos pero aki na Kòrsou nan a kambi’é un poko. Nan tin dos hende mas importante ku lo hasi e obra un tiki mas largu i mas elaborá. Ta trata di Elia Isenia i Eligio Melfor ku lo forma parti di e obra Papia. E dos invitadonan aki tabata esensial den e desaroyo di teatro i den e desaroyo di papiamentu. Nan dos ta komprondé di unda papiamentu a bin. Pa Vanta ta importante pa nan wòrdu karga. Nan ta bezig ku algu di diferente generashon i dor di esei nan so no por karg’é i mester di e generashon promé pa yuda karg’é i sigur si ta bai kont’é na pueblo di Kòrsou. Ta algu ku a tuma lugá for di añanan 17 i a keda karga di generashon pa generashon i el a krese. E obra ta djis un tiki mas largu ku un ora na La Tentashon. Lo tin tres presentashon pa públiko pero promé ku esei lo presentá pa skolnan. Diferente skol lo bai la Tentashon. Kòrsou tin tendensia di importá hopi kos pero aki tin e forsa propio i esei ta sigur nos idioma.

 

Ku e pensamentu pa trese Kòrsou…..

Na momentu ku a traha e obra aki na 2017 tabata e pensamentu pa tres’é Kòrsou. Tambe nan tin intenshon di por yega e otro islanan ku ta papia papiamentu. I si na Boneiru i Aruba tin interes nan lo ke bai, pero mester tin grupo pa hiba nan einan. Na Kòrsou tin Teatro KadaKen ku a yuda pa produsí e obra na Kòrsou. I meskos lo mester ta na Aruba i Boneiru.  Tambe nan tin kontakto ku New York pa por hiba e obra einan. E diáspora, kaminda tin hendenan di desendensia kreolisa, idioma, tur esei ta interesante i for di kuminsamentu nan a bisa si ku nan a traha e obra a Kòrsou.

 

Kiko ke logra ku Papia…

E idea tras di e obra aki ta ku nan ke logra e forsa di paden di nos yunan di Kòrsou. Kon nan por a hasi esaki bibando na Ulanda pero biniendo bèk i duna bèk a pone ku Kòrsou tin un forsa ku no por skapa di dje. Si bo lombrishi ta derá aki unda ku bo bai e lombrishi ta sigui bu i ta bai te China mes ku bo i bin bèk. I e poder, e diversidat, e poder di komprondé diferente kultura i reakshonnan na mundu, e poder ei ta propio di Kòrsou i ta algu ku aki mester siña ador’é i us’é komo poder. E ta poder kultural, ekonómiko, e ta un poder spiritual. E ta algu ku aki mester adorá i us’é.

 

 

E obra ta pa skol sekundario ta: 26, 27 i 28 di novèmber i presentashon pa públiko general;

Estreno 29 di novèmber 8 or anochi , 30 di novèmber 8 or anochi i 1 di desèmber 5 or atardi. 

Spònsernan ku ta hasi PAPIA posibel:

Fonds Podiumkunsten, Prins Bernhard Cultuurfonds Caribisch Gebied, Monqui Maduro library, Gobièrnu di Kòrsou OWCS, Maduro & Curiel’s Bank N.V., Banko Sentral Curaçao/Sint Maarten, Poetry Circle Nowhere. Karchinan ta optenibel na 24uur uit de muur i na Mensing’s Caminada.

 

Kontakto; Pa organisashonnan na Aruba i Boneiru ku ke trese PAPIA pa e islanan por tuma kontakto ku Juan-Carlos Goilo: +31641732204 i Vernon Chatlein +31615836609.

 

 

LAGA UN KOMENTARIO

Please enter your comment!
Please enter your name here