WILLEMSTAD.- ‘Kada un di nos, komo siudadano tin un responsabilidat propio. Den kualke funshon ku bo tin, si bo ta Parlamentario, si bo ta edukadó òf si ta den periodismo bo ta traha. Si bo ta riba kaya. Papia bo papiamentu korekto. Papi’é di moda e por sigui desaroyá i krese. Pa nos idioma no ta bira parti di lista di idioma ku no ta eksistí mas.’ Asina Nifa Ansano a bisa ayera na final di konferensia ‘Papiamentu Patrimonio Nashonal’ ku a tuma lugá ayera den Zona Kultural. E konferensia a keda organisá den kuadro di dia Internashonal di Idioma Materno dor di Ministerio di Enseñansa, Siensia, Kultura i Deporte pa medio di Fundashon Kas di Kultura den kolaborashon ku UNESCO Curaçao. Durante e konferensia diferente aspekto di nos lenga materno a keda deliberá. Un di e aspektonan importante ta ku mester tin mas atenshon pa e uso di papiamentu na un manera korekto. Segun Ansano, komo konklushon di e dia, tur hende tin nan mes responsabilidat den esaki. El a hasi un apelashon na tur hende presente pa hasi uso di e lenga korekto ora nan ta papia òf skirbi e lenga.
Manera ta konosí ayera den korant EXTRA diferente lingwista a ekspresá nan preokupashon pa e forma ku ta skirbiendo nos idioma riba retnan sosial, prinsipalmente riba Facebook i WhatsApp. Segun sierto lingwista ta lantando un semi-idioma na papiamentu kaminda no solamente tin un gran kantidat di eror gramatikal i di struktura di palabra. Awendia a pasa pa usa abreviashonnan ku na lugá di duna realse na nos idioma ta afektá nos idioma seriamente. Por ehèmpel no ta skirbi kompletamente "kon kos ta". Simplemente ta abreviá e palabra aki na "kkt" loke huntu ku abreviashonnan pa otro palabranan ta krea un idioma di horor. ‘Papiamentu no meresé esei. Mas bien ta flohera i ta duele pa konstatá ku prinsipalmente hóbennan ta hasi uso di e skirbimentu aki pero poko poko adultonan tambe ta partisipá na e proseso aki ku no ta purifiká nos idioma’, asina e lingwista aki a bisa.