Monique Brouwer & Han Deelstra

Awe djárason tin un charla riba e tópiko di Inkontinensia. Un tabú, un tópiko hopi interesante ku hende tin e tendensia di no ke ni papia di dje. Monique Brouwer ta eksperto di salú riba e tereno di inkontinensia i e lo papia tokante di e tabú di inkontinensia i mustra kon por biba un bida konfortabel ku esaki. Inkontinensia ta bai mas leu ku un eskoho di e produkto korekto.

Bon konseho, atenshon i petishon relashoná ku esaki ta prevení ku lo bo usa e produkto korektamente. Asina evitá tur konsekuensia ku esaki por tin pa bo salú, manera iritashon di kueru i kueru kòrá.

Nos a papia ku Monique Brouwer i Han Deelstra ku ta representá Benu Pharmacy, kendenan lo tei awe nochi na Avila Beach Resort den e sala Le Belle Alliance pa duna splikashon i kontestá tur pregunta.

          Charla awe  !!       

E charla ta den kuadro di Benu Health Series, na sèptèmber tabatin charla riba Asma i na yanüari esun di medisina Virtual. Tur esaki den e kuadro di e Health series, pa informá públiko di tur tópiko di salubridat awor tin inkontinensia. I lo bin mas den futuro. Awe lo tin e charla riba inkontinensia den Avila i for di 6 or por bin pa registrá. E ta habrí pa tur hende i e ta kompletamente grátis. No nesesariamente bo mester tin e problema di inkontinensia pa bo bin e charla. Kisas ta un famia tin e i asina bo ta bin skucha. Inkontinensia no ta toka hende grandi so pero hende yòn tambe tin e.

Problema di inkontinensia ta grandi

Monique a splika ku tin masha hopi hende den mundu kompleto ku inkontinensia. I tin hopi hende no ta rekonosé. I p’esei e charla pa splika tur e problemanan ku inkontinensia por trese kuné i kon largu por dura pa un hende sa ku e no por kontené. Tambe lo papia di kuantu posibilidat tin pa ofresé solushon pa e situashon di inkontinensia. E problema ta segun Monique ku hende ta gusta ignorá e problema pasobra nan tin bèrgwensa di dje. E problema ta ku inkontinensia por tin influensia riba un hende su bida sosial kompleto. Hopi biaha e hende tin asta miedu di bai un kaminda pa no haña nan den e situashon ku nan ta pèrdè urina sin por kontrolá esaki. I esei ta un di e puntonan den e charla sigur, segun Monique a bisa EXTRA.

Ta importante pa hende sa ku tin materialnan ku tin disponibel ku por yuda ku esaki.

Trein bo ‘bekken’

Inkontinensia no ta algu ku bo ta ripará asina fásil, pero bo ta bai tuma nota di dje ora bo wak kon bo ta pèrdè urina sin por kontrolá esaki. I ora yega e momentu ei ta bon pa bishitá un dòkter pa buska yudansa avansá. I por wak den un kaso asina ku bo por bin na remarká pa e “Bekken bodem training”, esta trein bo bekken pa hasié fuerte pa por wanta urina i no sak’é asina sin por kontrolá. I tambe tin materialnan ku por yuda ora ta trata di inkontinensia.

Kon bin hende ta haña inkontinensia segun Monique no ta algu konosí.  Tin masha hopi motibu ku por kondusí na inkontinensia segun Monique a splika. Pero tin biaha no por splik’é. E por tin di aber asta ku problemanan neorológiko.

Material disponibel

Problema di inkontinensia por bin entre otro si un hende tabatin problema di prostat, kanser na blas, hende ku tabata na estado tambe ta pone ku nan múskulonan di bekken ta bira suak i ora nan nister òf hari e urina ta sali sin kontròl. Den un kaso di inkontinensia leve por yuda ku training, pero si e ta mas serio mester buska materialnan pa apsorbá. Pero komo hopi biaha no ta papia di dje, hende no sa i no ke sa pasobra nan tin bèrgwensa. I p’esei mes e charlanan aki pa hasi hende konsiente ku ta un situashon ku tin solushon pe, pero ku bo no mester tin bèrgwensa pa papia di dje.

Serka hóbennan tambe

Monique a sigui splika ku inkontinensia no ta bin solamente serka hende grandi pero hóbennan tambe. Por papia di inkontinensia for di 20 te ku 50 aña e grupo ta grandi. I ta hasi manera ta pa hende riba 70 aña pero esaki no ta kompletamente bèrdat. Tin den kareda di 40% di hendenan ku inkontinensia ta bou di 60 aña. Tin hende tin miedu di hari pa nan no uriná nan paña. I mester kita for di e persepshon ei, pa hende por sigui hasi pasobra tin solushon. “Ta masha remarkabel ku hende ta papia mas lihé di hooikoorst en bes di inkontinensia siendo ku inkontinensia ta un problema muchu mas grandi ku Hooikoorst”, Monique a splika.

Mas hende muhé ku hende hòmber

Inkontinensia ta bin mas tantu serka hende muhé ku hende hòmber. Pero hende hòmber ta kresiendo. Pa e grupo aki ta mas difísil pa papia di dje pasobra hende muhé ta haña su menstruashon i ta kustumbrá pa usa e materialnan. Pero tin material pa e hende hòmber tambe usa. Ta importante pa usa e material korekto pa evitá di haña urina riba bo kueru pasobra e por duna problema ku kueru tambe.

Ora nos tabata mucha a siña nos pa bira “zinderlijk” pero ora hende ya adulto urina den nan karson nan ta haña bèrgwensa. I bo tin di bai siña kon no uriná den bo paña. E bèrgwensa ei mester kita for di nos mente.

Han Deelstra a bisa ku e materialnan ku Benu Pharmacy ta ofresé ta hopi.  Tin hopi produkto ku por yuda. Tin hende ta kere ku ta pampers mester bisti pero tin mas posibilidat manera trein e múskulonan i kisas no mester di nada. Pero tin “inleggers” ku ta un di e materialnan. Tin hende ta kere ku ta un pamper, esta algu grandi mester bisti pa wanta tur e urina, pero Monique a bisa ku tin biaha ku un “inlegger” chikí por yuda ku e problema. P’esei e charla di awe pa splika kon i ki ora ta usa esakinan.

Lo tin material awe tambe disponibel pa hende por wak kiko tin disponibel pa hende por mira kiko tin. Den e charla di awe por akapará 100 persona. E charlanan anterior tabata kompletamente yen i tin hende a keda ku gana di presentá. I p’esei un yamada pa registrá online i yega Avila na tempu.

Benu, segun Han a bisa ku ta bon pa informá pueblo. Bo ta parti di un komunidat i bo tarea ta pa duna bon kuido i parti di esei ta informá. I p’esei e Benu Health Series ku lo bin ku diferente tópikonan. E próksimo kisas lo ta Diabétis tambe lo bin hipertenshon. I si hende pidi pa sierto tópikonan tambe lo traha riba dje.