Masscha Duncan a nase na Hulanda pero di mayornan yu di Kòrsou. Na edat chikí el a bin biba Kòrsou i despues di a kaba skol a bai studia na Hulanda. 21 aña despues i ku profeshon den sikiatria Masscha ta bolbe bèk Kòrsou ku su famia. I el a kuminsá ku un proyekto Papiamentology, dunando kolo i biba na nos dushi lenga papiamentu.

 

Inspirativo

Masscha tabata un invitado den Djasabra kaminda ku hopi energia i entusiasmo el a konta di Papiamentology. E proyekto a kuminsá aña pasa. “Mi tabatin un deseo di mira algu di nos papiamentu i di e forma di ‘postnan’ na ingles i un fondo bunita i ku mas pèp. Mi di dikon mi mes no kuminsá hasié. I asina mi a kuminsá ku un, e nòmber Papiamentology mi di e ta mas kaptivo i asina mi a kuminsá. Mi a kuminsá postelá mi kosnan riba Facebook, mi frasenan. Mi ta usa e buki di oro pasobra tin hopi aksènt aki i aya. Mi ta papia papiamentu pero e parti di ortografia mi tin un tiki ménos i p’esei mi ta usa e buki di oro òf mi ta puntra mi hendenan kon ta skibi tal i tal palabra. Asina el a kuminsá. Mi a kuminsá haña mi siguidónan i mi ta purba atraves di mi siguidónan dor di laga nan tambe kontribuí ku frasenan. E mester ta frasenan positivo, inspirativo, algu ku ami òf abo òf un hende eifó ta sintié yama ku nan”.

 

Tiki tiki lo dominá e papiamentu

Ta masha importante pa tur hende por dominá su idioma bon. Masscha mes a biba 21 aña na Hulanda i e ta papia hopi palabra ainda na hulandes. Tiki tiki e ta purba di saka e palabranan hulandes afó i pone mas tantu papiamentu. E ta un proseso ku Masscha ta pens’e na hulandes i tradusié na papiamentu. Dia el a bai biba Hulanda e mester a hasié nèt kontrali.

 

Romántiko

Papiamentu ta un idioma masha romántiko. Na hulandes bo ta usa un palabra i na papiamentu kisas mas ku un frase. Papiamentu tin algu romántiko kuné ku tur su aksèntnan di aki i aya.

 

Frase pa toka kada hende

Papiamentology ta trese frasenan pa toka kada hende ku ta lesa nan. I banda di esaki e kolonan. Pa loke ta e kolonan Masscha a bisa ku si mira den su diseñonan e ta usa hopi ‘dots’. Esei e ta simbolisá kònfèti i den dje hopi kolo. Kònfèti ta nifiká fiesta, e ta alegria i tur kos ku ta alegrá un hende manera positivismo. I esei por mira bek den su diseñonan. E mester ta algu kolorido pa kapta hende su atenshon. E papiamentu no ta konosí hopi kaminda pero maske kon chikí e ta, ta duna su balor pasobra ta nos kos.

 

Un aña di papiamentology

Papiamentology awor aki a kumpli un aña. El a kuminsá na Hulanda i na Kòrsou a ekspandé. I den esun aña aki Masscha a menshoná un frase ku el a gusta mas. “Mi a saka un seri di djaluna te ku djadumingu i kada un lèter tabata simbolisá e dia por ehèmpel e D di djamanta, e A di alegria, i ora mi a postelá un dia lat mi ta haña un yamada kaminda ta bisa mi ku esun di djaweps mi no a postelá ainda. Esei ta loke mi a haña hopi reakshon di dje. Tin masha hopi frase ku a keda kompartí masha hopi mes”.

 

Reakshon di tur skina

Loke ta inspirá Masscha ta; sinta den un kombersashon ku amistatnan e ta tende algu, òf tende algu na televishon, pero e mes tambe ta buska i ta sigui Bob harms i wak su kuotanan di bida ku ta inspirativo i si e ke fia un frase e ta pidié nèchi pa e drech’e estilo di Papiamentology. Den kuminsamentu e tabata pidi hopi hende pa frasenan i tiki tiki e tabata haña esakinan. Si tin algu den e frase ku e tin gana di tapa òf kambia, e ta puntra e persona konserní promé. E ta haña hopi reakshon di hendenan ku ta sigui Papiamentology. Ta di tur skina e ta haña reakshon.

 

Tarheta i mug

Masscha tin diferente tarheta i asta esun di kondolensia ta asina bunita i kapta atenshon. E tarhetanan ta mas moderno i mas estilo di 2021. I no solamente tarheta pero tambe e frasenan positivo ta bai riba mug. Te ainda e tin 3 diseño di mug; un di nan ta “Positivismo…Kargando”. Awor aki Masscha ta trahando estilo di evento ‘Pop Up’. Fin di òktober lo tin un ‘Pop Up’ i tiki tiki e lo bira mas konosí den Kòrsou. Lo anunsiá despues na unda e evento ‘Pop Up’ di fin di òktober lo bai tuma lugá kaminda por haña tur e tarhetanan i tambe e mugnan ku Masscha ta ofresé.

Un paso grandi; mi a bin kas bèk

Manera nos a menshoná ariba Masscha a biba 21 aña na Hulanda i tabata un paso grandi pa e bandoná Hulanda i bin Kòrsou bèk.  Ta su karera, su kas i tur su kosnan, su amistatnan i na kuminsamentu di e aña aki el a disidí di bai kas bèk. E ke bai bèk serka su mama i serka su famianan na Kòrsou. El a entregá karta di retiro, entregá kas, bende su kosnan i a bin Kòrsou. El a bin sin trabou i e tabata sigur ku ta Kòrsou i kas e kier a bin bèk. E sa ku e lo keda kla ku trabou i keda kla ku tur kos. Masscha a bisa ku el a purba 21 aña na Hulanda i awor e ta purba na Kòrsou.

 

Publiká ku regularidat

E frasenan di Masscha ta riba Facebook i Instagram Papiamentology. Praktikamente tur dia òf ku basta regularidat e ta publiká un frase pa toka otronan. E sa ku no ta tur dia e por publiká for di mainta. El a bin biba Kòrsou i tin hopi kos di regla pero e ta hasi su esfuerso pa postelá su frasenan. I te ainda el a ripara ku su frasenan tin impakto riba e hendenan ku ta siguié. E ta aña appnan di hendenan ku ta bisé kon e frasenan ta drecha nan dia. I maske kon chikí e viktoria ta, Masscha ta selebré.

 

Skibié bon

Pa loke ta e papiamentu mes Masscha a bisa ku teniendo na kuenta 20 aña pasa promé ku el a bai Hulanda, e ta haña ku e papiamentu a bira mas difísil ku hopi aksènt. Pero awor aki e ta mas konsiente kon pa skibi e papiamentu kontrali ku ora el a kuminsá promé kuné. E ke skibié bon i no ke skibi algu robes ku e tin di postelá. E mester ta  korekto skibi.

Parti positivismo

Mi ke parti positivismo riba Kòrsou. Esun ku gust’e gust’e i esun ku no gust’e lo bai gust’e, mi ke wak kon ta hink’e den otro ku e ta yega di Bándariba te Bándabou. Mi ke parti positivismo. Masscha lo ke yega na un tienda di Papiamentology riba e tres islanan ku ta papia papiamentu.

 

LAGA UN KOMENTARIO

Please enter your comment!
Please enter your name here