Tokante eksonerashon di 3 miar na debe di impuesto

WILLEMSTAD.- Frakshon di PAR i MAN ta pidi presidente di parlamento, Charetti America-Francisca pa invitá representantenan di e Hunta Sosial Ekonómiko (SER) pa nan ta presente na e reunion públiko di parlamento riba eksonerashon di 3 miar florin na debe di impuesto. E frakshonnan ta di opinion ku e rapòrt di SER ta duna konklushonnan ku ta relevante pa e deliberashon durante e reunion públiko ku ta planiá pa tuma lugá 24 sèptèmber awor.

Pa e motibu aki ta pidi pues pa invitá SER ta presente pa duna splikashon verbal di nan konklushonnan. Den nan karta frakshonnan di PAR i MAN ta trese dilanti ku dia 19 yüli 204 SER a saka un konseho públiko basá riba e proposishon di lei pa stipulá un areglo temporal pa limpia registronan di servisio di impuesto i kambio den e lei di “omzetbelasting”. “Den e rapòrt SER ta konkluí di forma kuidadoso ku e medidanan di sanashon di impuesto ku a implementá, a sosodé sin un base legal.”

Mas aleu frakshonnan ta bisa den nan karta: “Un minister ku ta trapa nos leinan, for di lei di kontabilidat, siguiendo ku nos Areglo di Estado ku ta regla e derecho di parlamento pa fiha presupuesto di pais (“budgetrecht”) i te kisas kibrando leinan penal, ta un bèrgwensa i un peliger pa gobernashon. Den kuadro di esaki a pidi un reunion pa deliberá riba e tópiko di eksonerashon di 3 miar florin.”