WILLEMSTAD.- Frakshon di partido PAR ke risibí tur dokumento, konseho i desishon relevante ku a kondusí na e desishon pa eksonerá vários mil mion florin di debe na impuesto, inkluso e instrukshon formal di minister di Finansa, Javier Silvania pa hasi ehekutá e eksonerashon aki. Asina lider di frakshon di PAR, Quincy Girigorie ta indiká den un karta dirigí na minister Silvania.

Djaluna 19 ougùstùs awor porfin e reunion di Komishon Sentral riba desishon di Silvania pa na yanüari 2023 eksonerá 3 mil mion florin na debe di impuesto ta kontinuá. Ta trata di un reunion ku a inisiá 11 mei 2023 i suspendé despues ku parlamento a hasi pregunta.

“Apesar ku minister a tarda mas ku 1 aña i 3 luna pa onra parlamento ku su kontestanan, e órgano ku mester kontrolá minister su akshonnan i nos komunidat pagadó di impuesto ta sumamente ansioso pa risibí e kontestanan aki, ya ku minister su akshon pekuliar di eksonerá debe na impuesto  tabata unu sumamente fundamental i a mishi ku konfiansa di e pagadó fiel di impuesto.”

Girigorie ta urgi e minister pa manda e dokumentonan denter di 4 dia despues di su karta ku ta fechá 7 ougùstùs 2024, pa asina miembronan di parlamento por prepará nan mes debidamente pa e reunion. E echo ku a tarda mas ku 1 aña i 3 luna pa e minister bolbe den parlamento pa kontestá pregunta di parlamentarionan segun Girigorie ta posiblemente un rekòr nobo pa e sistema demokrátiko di Kòrsou.

Foto:

...Quincy Girigorie...