Martines:
WILLEMSTAD.- Parlamentario pa partido KEM, Michelangelo ‘Low’ Martines ta hasi un petishon na promé minister, Gilmar ‘Pik’ Pisas pa kanselá e seremonia di firmamentu planiá pa tuma lugá awe ku e kompania Oryx Midstream Private Ltd (Oryx Midstream). Gobièrnu mester bini parlamento promé i duna informashon pa asina pueblo ta na altura di tur loke tin den e kontrato promé ku firma esaki.
“Danki pa e invitashon di e firmamentu di e kontrakt entre Refineria di Kòrsou i Oryx Midstream. Mi persona lo no presentá na e seremonia aki, mirando ku komo un parlamentario ku ta respetá su mes i su pais, ta imposibel ku mi por bai sinta partisipá, saka pòrtrèt, fiesta, bebe fuma na firmamentu di un kontrato (misterioso) ku ta mara mi pais pa 30 aña largu ku un kompania ku mi no tin ningun klase di konfiansa den dje”, Martines ta deklará
E ta sigui bisa: “Mas tristu ainda ta ku nos promé minister, Gilmar Pisas a yega na e desishon aki sin presentá na parlamento pa por a duna parlamento i pueblo di Kòrsou tur informashonnan di loke tin den e supuesto kontrato aki.” Martines ta bisa ku e lo no ta presente na e seremonia awe pasobra mañan ku Dios ke e no ke ta kómplise òf testigu di a forma parti pa yuda horka su pais.
Hustamente partido MFK den pasado tabata eksigí ku kontinuamente gobièrnu mester duna parlamento informashon di negosiashonnan ku ta andando pa bende propiedatnan di pais. Asta parlamento a aprobá un moshon riba esaki.
Asina mes ora ku gobièrnu duna informashon e partido tabata reklamá ku no ta posibel ku ta negoshá areglo di “non disclosure” den kontratonan. Awe MFK mes ta negoshá kontratonan ku “non disclosure” i pa kolmo manera Martines ta reklamá no ta ni duna parlamento informashon di kiko ta bai firma.
Parlamentario independiente Zita Jesus-Leito tambe ta bisa ku e no a risibí informashon riba e kontrato ku ta bai firma entre Refineria di Kòrsou (RdK) i Oryx Midstream. E parlamentario asta tin su dudanan si realmente ta bai firma un kontrato di hür.
Jesus-Leito ta bisa ku na promé instante el a pensa pa no bai e seremonia di firmamentu. “Pero si bo no bai i tuma nota di kiko ta firma, bo no por hiba krítika despues tampoko, p’esei mi ta kere ku mi lo bai tòg awe.”
Te ku resien frakshon di MFK a yama un “vragenuur” pa kuestioná benta di UTS ku e kompania Flow. Un benta ku eks minister Jesus-Leito a bai parlamento na mas ku 1 okashon kuné pa duna informashon. “Nan a yama e reunion ei djis pa trata na tapa mi boka, pasobra mi a pidi un ‘vragenuur’ riba kompra di Campo Alegre, pero te ainda gobièrnu no por bisa kiko na ta bai hasi ku e propiedat aki.”
RdK ta firma awe promé di yüli awor un kontrato di hür (“lease”) pa 30 aña ku e kompania Oryx Midstream pa manehá i operá e fasilidatnan di Emmastad i e terminal di Bullenbaai na Kòrsou. E selekshon di Oryx Midstream ta konkluí un proseso integral inisiá pa RdK na yüni di aña anterior, ku a kuminsá ku un yamada di ekspreshon di interes. Di e 19 respondentenan, a pre selekshoná 7 na ougùstùs segun e informashon presentá.
Despues di evaluashonnan profundo, Oryx Midstream a surgi komo e partner preferensial. A firma un Memorandum of Understanding (MoU) inisial, ku a permití tur dos partido pa hasi inspekshonnan tékniko i diligensia detayá.
“E MoU akí a pone e fundeshi pa e negoshashon eksitoso di e kontrato di hür di término largu. Oryx Midstream ta prepará pa atraé invershonnan supstansial pa Latinoamérika i e region. Ku un eksperensia amplio den atkisishon di energia den sektornan petrolero i gas (“upstream”, “midstream” i “downstream”) i tambe den energia renovabel, Oryx Group ta un aktor stratégiko den e merkadonan prinsipal di krudo na mundu.”
Foto:
…Michelangelo Martines…
