WILLEMSTAD.- Riba Schottegatweg Oost na altura di Banco di Caribe un siudadano a hala nos atenshon riba un parada di bùs ku ta un peliger pa tur ku ta sinta einan, inklusivó e mes. El a bisa EXTRA ku diariamente e ta sinta na e sitio aki, pa kue bùs i dado momentu su wowo a tira riba e pipa di heru ku ta wanta e dak, ku tei pa tapa solo i poko áwaseru. Loke el a mira a spant’e. Algu tur frusa i ku djis un tiki bientu e lo bin abou.

I pa kolmo djis tras di parada di bùs aki tin un palu di lus di kaya ku su shirishiri ta bin afó. Esei tambe otro peliger pa peatonnan den bisindario. E siudadano ta pidi pa outoridatnan kompetente tira un bista riba e situashon peligroso aki.