WILLEMSTAD.-  Ayera durante tratamentu pro forma di e kaso di asesinato na Weto  ku a tuma lugá dia 7 di aprel aña pasá,  e hòmbernan Reymison ‘Chino’ Martina  i Edmar ‘Eto’ Clemencia  tabata presente den sala di korte pa responsabilisá nan mes pa e kaso.

Clemencia ku ta enkarselá na Hulanda, por a sigui e kaso via konferensia di video, despues ku e no por a keda trasladá mas pa Kòrsou.

Huntu ku ámbos akusado, pareha i mama di Clemencia su yunan, de Meeza, tambe tabata den sala di korte komo testigu.  Tantu Martina komo Clemencia ta keda akusá pa dòbel asesinato dia 7 di aprel aña pasa na Weto, na momento ku e hòmber Ulrich ‘Uchi’ de Pablo a keda likidá.

E víktima  Shurijon  Noor tambe a pèrdè su bida durante e tiroteo. De Meeza ayera bou di huramentashon a bisa ku Eto ta bon tata pa su yunan, pero e tabata rabiá kuné durante e dia nan en kuestion i p’esei el a yama polis i gaña riba dje.

Segun de Meeza na polis, tur kos a kuminsá na momento ku Eto a haña sa ku e tabatin un relashon amoroso ku Uchi. Esaki despues ku el a haña vários kòmbersashonnan entre su persona i Uchi den un telefòn bieu ku e tabatin. Hues a puntra de Meeza ku esei ta bèrdat, el a akseptá ku si.

Hues a sigui relatá ku de Meeza a sigui deklará na polis, ku despues di esaki Eto a sak’é fo’i kas i ku el a bai kas di su wela.

Un dia Eto a yam’é i bisé pa nan topa na kas di wela. Ora ku el a yega, ya Eto tabata pará einan.  Eto a drenta su outo i bin sinta den di dje. Eto a baha i agredié algun bia na su kurpa. Despues Eto lo mester a kue su vehíkulo pone un tiki mas leu, saka un arma fo’i su saku i lòs komo 6 bala riba e outo. Segun su deklarashon na polis, de Meeza a bisa ku Eto tabata para na porta di e vehíkulo miéntras Eto tabata lòs bala riba e tapa di mashin. De Meeza a ninga redondamente di a deklará tur esakinan na polis. El a bisa ku ta un mentira ku polisnan a saka. Hues a puntr’é si ta mentira dikon el a firma e dokumentonan.

Mas aleu hues a sigui relatá ku na polis de Meeza a duna di konosé ku si Eto a haña e videonan, e lo mat’é. E deklarashon aki tambe de Meeza a ninga.  De Meeza a sigui konta na polis, ku dia 6 di aprel Eto a manda dos video p’e, kaminda e ta kima su pañanan i tambe su sapatunan. Ayera de Meeza a bisa ku el a kere ku tabata su pañanan, pero despues a resultá ku ta Eto su mes pañanan e tabata kima.

Pa loke ta trata e tiroteo riba e vehíkulo de Meeza a bisa ku no ta Eto a tira riba e outo,  e tabata paden i no sa kiko a pasa.