WILLEMSTAD.- Ayera den oranan di anochi un kantidat di patruya a keda dirigí pa Kaya Timbal na Sta. Rosa despues di a risibí informashon ku lo mester tin un kaso di tiramentu ku a kaba di tuma lugá i ku lo tin hende heridá.

Na yegada di e promé patruyanan mesora a pidi presensia di ambulans debí ku tabatin dos persona ku a risibí tiru na entre otro man i tambe pia.

Dos ambulans a presentá na e sitio pa duna e dos víktima nan promé asistensia i despues a transportá tur dos pa departamento di emergensia pa tratamentu médiko avansá.

Investigashon preliminar ku a inisiá na e sitio a indiká ku tabata algun ratu promé ku algun tipo a pasa dilanti di e kas i lòs vários tirunan dirigí riba e pareha ku na e momentu ei tabata den kurá.

Na momentu ku e dama a tuma nota di e sospechosonan, el a bai kore pa skapa su yunan i a risibí impakto di bala.

Investigashon den e kaso aki ta kontinuá.