WILLEMSTAD.- E akusado femenino L. Meriana- Groene(42), a keda demandá na un kastigu di 42 luna pa maltrato severo, intento di asesinato i menasa ku morto di su esposa hulandes sra. N.Groene.

E señora ta akusá di a trata na kita bida di su kasá, dor di agredié ku un chapi vários bia rònt di su kurpa, dia 9 dia aprel 2021.

E víktima tabatin heridanan grave na su kurpa i mester a wòrdu transportá pa CMC, pa haña tratamentu médiko avansá. Segun rapòrt médiko, e víktima tabatin repchinan fraktura, heridanan grave na banda di su kara, pia frakturá i vários raspa rònt su kurpa.

E akusado ta enkarselá i a presentá den sala di korte pa responsabilisá su mes pa su akto. E víktima por a sigui tratamentu di e kaso via e sistema di konferensia di vidio. Hues a duna di konosé ku riba e dia enkuestion, a drenta un informashon na polis, ku den kaya Elegansia tin dos hende muhé tabata bringa formalmente ku otro i  un di nan tabata tur na sanger bentá abou. E informante a bisa polis, ku un di e muhénan tabata agredí e otro ku chapi rònt su kurpa. Ambulans a presentá na e sitio i a hibá e víktima CMC kaminda el a bisa ku ta su kasá a agredié. Segun e víktima, ora ku e akusado tabata agredié ku e chapi, el a rog’e pa stòp, paso e tabata tur na sanger i tabatin hopi doló. E akusado a bis’e ku e ta dun’e 10 minüt pa e hala rosea i despues lo e mat’e.

E akusado na su turno a konta ku e tin 10 aña kasá ku e víktima. Durante e 10 aña nan ei, tabatin hopi problema i turbulensia den nan matrimonio. E ta kere ku e dama ke tin relashon tambe ku hende hòmber. El a opta pa sigui ku e dama tòg, pa motibu ku e stim’e i hamas ni maske nan separá for di otro aworakí, e lo no hasié daño.

El a splika ku e víktima tin un karakter hopi fuerte i e dia ei e tambe a haña basta sla serka dje. Segun e akusado, e tambe tabatin vários kap na su kabes, despues ku e víktima a agredié ku un pipa. E tabata tur na sanger. Ora polis a bin, nan a tuma nota di esaki, pero tòg ambulans no a bai kuné hospital.  Segun e akusado, e dia nan promé su kasa tabata aktua hopi straño. El a bisa ku 4 dia promé, su kasá a bin bisé ku un hende hòmber ku nan konosé, ku el a bin kas kuné, a viol’é. EL a rabia ku e akusado, paso e víktima ta haña ku e akusado no a defendé manera un machu ora el a kont’e di e suseso. Aki el a kuminsá dal’é  ku un opheto skèrpi  na su kurpa, pa despues e kos sali kompletamente for di man.

Testigu a bisa ku nan tabata biba den un bisindario hopi trankil, te dia e dos personanan aki a bin establesé nan mes. Kasi tur anochi nan ta bringa ku otro i tin hopi pleitu entre nan. Segun e testigunan, e akusado ta uza droga i ta kana grita ku e ta mata tur hende ei banda. E muhé hulandes semper ta bira su víktima.

Hues a duna di konosé na e akusado, ku na polis el a deklará otro kos. El a bisa ku e anochi ei el a mira dos hòmber kore pasa dilanti su kas, mas ku dos bia den un outo. El a disidí di sali i puntra e hòmbernan kiko nan ta kore hasi i nan a bisé ku ta e dama (su kasá) nan ta buska. E dama aki a sali pafó i un di e hòmbernan a oblig’e drenta e outo, miéntras un otro hòmber a keda na su kas ku su kasá. Esun ku a bai kuné den e outo, a keda kore rònt kuné un par di ratu. Despues el a hib’e kas i ora el a drenta paden, el a mira bòter di alkohòl i droga riba e mesa.  Direpente el a sinti un sla riba su lomba  i nan a kuminsá agredié. Hues a bisa ku esaki ta henteramente otro deklarashon di loke el a duna den sala di korte .

Fiskal ta haña e akusashon kompletamente probá a base di e rapòrt médiko di e dama i tambe su deklarashonnan. Mirando esaki fiskal ta yega na un demanda di 42 luna di kual 12 kondishonal, guia sikiátriko i tambe guia di Reclassering. Hues lo tuma desishon aki 3 siman.