WILLEMSTAD.- E pareha C. Cepeda (27) i S. Walle (22) akusá pa 31 kaso di atrako armá i 1 kaso di intento di asesinato, a produsí durante e atrakonan ménos ku 51 mil florin na tur durante 1 aña i mei.
Ta trata di e kaso ku a haña e nòmber “Mystery” mihó konosí ku kaso Vitz òf “pèchi kamuflahe”.
Durante di e atrakonan e pareha tabata bai ku sumanan entre 200 pa 6500 florin ku ta e montante di mas haltu ku nan a logra bai kuné.
Durante tratamentu di e kaso e akusado femenino a bisa ku Cepeda tabata dun’é e loke e ke ora ku nan kaba di kometé atrako.
Miéntras ku Cepeda ta bisa ku ta Walle tabata konta e plaka i repartí e botin entre nan.
Riba e pregunta di fiskal Hato-Willems na Walle dikon dia a detené Cepeda, el a bai hòspital ku e mesun Vitz ku nan tabata kometé atrako pa bishit’é, manera nada a pasa i no a bai polis, Walle a bisa ku e tabata sa ku polis ta detené pasó Cepeda a bisa kaba ku e tabata e shofùr.
Hues Snitker mas aleu a bisa Walle ku e ta keda straño kon e ta bisa ku e tabata bou di menasa di Cepeda i tòg durante 1 aña i mei el a fungi komo shofùr di e vehíkulo di fuga den mas ku 30 atrako. Hues a bisa Walle ku e ta pensa ku aparte ku e ta bisa di tabatin miedu, e ta pensa ku e tabata gusta e sensashon di kometé atrako.
Mas aleu hues a puntra Walle si e ta konsiente ku el a yuda okashoná pániko 1 aña i mei na e komunidat, 1 aña i mei di trouma den e komersiantenan, 1 aña i mei poniendo polis man na kabes ku tur e atrakonan ku nan tabata kometé i pone e pueblo den shòk.
Walle a bisa ku e ta konsiente pero e no por a hasi nada pa motibu ku e tabata kompletamente bou di menasa.
Fiskal Hato-Willems a duna di konosé den su rekistorio ku den promé instante Walle a bisa ku e tabata bou di preshon di Cepeda, pero despues el a hasi uso di su derechi keda ketu. Segun fiskal, e promé bia por ta posibel ku e tabata bou di menasa pero e no ta kere ku tur e sobrá 31 kasonan tambe e tabata bou di menasa.
Fiskal a bisa ku no por a proba tampoko ku esei ta e kaso. P’esei e ta tuma Walle tambe hopi na malu pasó el a bai di akuerdo ku tur e atrakonan i tambe uso di arma.