WILLEMSTAD.- Hues Verbeek  durante un kaso di poseshon di arma a apsolvé un pareha di tur kulpa den nan ousensia.

Ta trata di e akusado femenino I. Martis (20) i L. Geertruida (37)  ku ta keda akusá di a tira un arma di kandela marka Pietro Baretta kaliber 9 mm mas 15 bala pafó di bentana durante un persekushon.

Ambos sospechoso ta konosí pa polis den algun kaso. E akusado femenino aña pasá a keda kondená komo kómplise den un kaso di atrako kaminda e tabata den poseshon di prendanan hòrtá. El a bisa di a haña e prendanan serka su frei di e tempu ei (ku ainda ta será) i no tabata sa ku ta trata di kosnan hòrtá. Pa loke ta trata e hòmber L. Geertruida tambe tabata den vários kaso penal i na 2018 a sali liber for di un kaso di tripel asesinato.

Segun e akusadonan dia 8 di desèmber 2020 un persekushon kòrtiku ku a inisiá den Saliña a terminá na altura di Lanthùis Hel ku dos detenshon.

Riba e dia ei, alrededor di dies pa diesdos, polis a tuma nota di un shofùr ku tabata kore di un forma iresponsabel den Saliña.

Na momentu ku e unidat a ordená e shofùr pa para, el a hisa velosidat i kore bai.

Polis a kuminsá ku un persekushon i na altura di Lanthùis Hel, a logra para e vehíkulo aki.

Durante di investigashon a sali na kla ku e pareha ku tabata den e outo, un hòmber i un muhé, lo a benta un arma di kandela for di e vehíkulo.

Abogado Obispo ku a hiba e defensa pa ámbos pareha a bisa ku no por akusá nan di e arma.

Segun e abogado ora ku e promé patruya a para e pareha i kontrolá tur kaminda, nan no a haña e arma.

E di dos patruya ku a presentá si a logra haña e arma den un mondi den serkania. E pareha a ninga ku e arma ta di nan fo’i prinsipio.

Fiskal a haña e akusashon kompletamente probá i a pidi kastigu di 18 luna pa ámbos akusado.

Hues den su desishon a bisa ku no por proba e akusashon di arma di kandela. Hues a splika ku e promé agentenan a hasi un búskeda sin por a lokalisá e arma.

Ta ora e di dos patruya a yega e agentenan a bai kana mesun kaminda i a haña e arma. Esaki ta trese un duda i no por akusá e pareha di a benta e arma afó.