WILLEMSTAD.-  Ayera  durante tratamentu di e kaso di e dos agentenan C. Solano (45) i R. Balijn (46)akusá pa maltrato severo, intento di maltrato i maltrato ku violensia riba kaminda públiko dia 18 di yanüari 2020 riba e víktima di fam Green, un pareha ku aparentemente a presensiá loke a pasa a para komo testigu.

E pareha ta biba nèt despues di 3 kas kaminda e suseso a tuma lugá.

E dama ku a drenta promé komo testigu, bou di huramentashon a konta kiko el a presensia e dia ei.

Segun e dama e tabata den kas ora ku direpente el a skucha un zonido hopi duru. Ora ku el a sali wak, el a mira un outo para riba un tereno djis banda di su kas i un hòmber sintá patras den e outo, a baha kore bai. Despues el a mira un kantidat di polis kore bin riba e hòmber yam’é” homo” i kuminsá batié ku moketa den su kara i tambe skòp ora ku el a kai.

Dado momento el a puntra un di e agentenan dikon mester bati e hòmber asin’ei.

E agente a bis’é ku e shofùr  tin nan basta ratu ta kore busk’é den Montaña Abou.

El a bisa e agente ku esei no ta motibu pa bati e hòmber di e forma ku nan ta hasiendo.

Segun e dama testigu, asta su  yu menor te awe a keda troumatisá, pa e forma ku el a mira kon e polisnan tabata bati e shofùr.

Despues di e dama, su kasa tambe a drenta i deklará meskos bou di huramentashon.

El a splika ku e dia ei ora el a tende e zonidu duru el a mira un vehíkulo i e polisnan a kore bai riba e shofùr i kuminsá batié ku moketa for di den outo.

Nan a yam’é “homo”, batié ku skòp i despues lant’é pone su man riba baul.

Fiskal Leepel a bisa Balijn ku na polis e no a bisa ku el yama e shofùr “homo”.

Mas aleu fiskal a puntra Balijn dikon e no a detené e shofùr òf hasi denunsia kontra dje pa maltrato, manera el a splika ku ta e shofùr a kuminsá bringa kuné promé.

Balijn a deklará ku su kolega “wacht comandant” riba patruya Solano, a bis’e pa nan detené solamente riba e lei di L.T.U. ku ta (Landsverordening toelating en uitzetting) pues komo indokumentado. Ambos agente a bisa ku no ta kuadra loke e testigunan a deklará. Segun Solano nan tin prueba  ku loke e pareha a deklará no ta bèrdat. El a bisa sea nan a akordá ku e víktima òf nan a lesa korant. Pero e pareha no sa kiko el a mira i a deklará kosnan ku no ta kuadra.