CARTAGENA – Un pareha ulandes a fayesé na inisio di e siman aki na Colombia. Awor a bin sali na kla ku probablemente ta pa motibu di venenamentu. Segun ministerio di Asuntunan Eksterior e víktima nan ta, un hende hòmber di 31 aña di edat i un hende muhé di 29 aña di edat ámbos di Amsterdam. E bosero a indiká ku segun outoridatnan lokal na Cartagena ta trata di venenamentu pero ta hasiendo mas investigashon. E ministerio tin kontakto ku famianan i ta duna asistensia tambe via e konsulado. Despues di outopsia lo hiba e kurpanan Ulanda. E dos turistanan ulandes a yega Cartagena djasabra último. Nan tabata kedando den e parti antiguo di e sentro di siudat. Tabata djaluna último ku nan a kuminsá reklamá di dolor di barika fuerte. Parti anochi nan a keda hiba un klínika pero a bin fayesé algun ora despues. Prensa kolombiano mes a skibi ku e motibu ainda no ta konosí. Un dòkter ku a yuda e pareha a indiká ku ámbos tabata preshon hopi haltu, problema ku barika i a kai den manera un shòk. El a bisa ku e kaso ta den man di polis.