Anais Arundel Godfried ta konta    

...Parke Den Dunki ta un di e 32 parkenan ku Stichting Uniek Curaçao ta preservá. E ta un parke importante pa historia di Kòrsou. Aki tabata un kampamentu di katibu meskos ku St. Joris tambe tabata.

Despues di lunanan largu riba laman, katibunan ta yega tera, nan ta baha nan aki, duna nan di kome i bebe pa haña forsa bek i bende nan. Segun informashonnan den archivo, pa motibu ku e área ta sera di Punda e tabata un kampamentu di katibu. E katibunan no tabata biba einan.

Ora subi e tereno di Den Dunki por tuma nota di un brùg bieu pero te ainda bon konserva. E brùg ei tabata un Zwanenbrug. E tabata yama asina ya ku bou di dje tabatin awa i e famia ku awor ta doño di e tereno tabatin nan zwaan nan den e awa ei.

Famia Gorsira, doño di e tereno ei, ta un di e 7 doñonan di henter e tereno ei. Den Dunki tabatin un grandura di 9.5 hèktar pero awe ta poko mas chikí. E motibu dikon e tin 7 doño segun Anais a konta Djasabra, ta pasobra nan huntu a kumpra e tereno ei ku intenshon di ten’é habrí pa públiko. E ta un regalo pa Kòrsou pa tur hende por hasi uso di dje, konosé e historia i rekreá den dje. I CTB ta sostené e kousa ei i Uniek Curaçao ta sòru pa e mantenshon. E ta masha importante pa turismo, pasobra turismo sin rekreashon tiki tiki ta muri.

Den kareda di aña 1935 Famia Gorsira huntu ku e otro 6 famia a tuma e tereno i a traha algun brùg i tambe pos ku tin te ainda riba e tereno di Den Dunki. Leyenda ta bisa ku riba e brùg tabata bende katibu pero esaki ta historia ku no ta “make sense”. E material ku e brùg ta traha di dje en bèrdat ta di e temporada di katibu pero e brùg no tabata eksistí e tempu ei. E material ta bin di e kasitanan riba e tereno e tempu ei i famia Gorsira no tabata ke tin nada di aber ku e periodo di sklabitut i nan a basha tur kos abou i loke a sobra nan a traha e brùg i e posnan riba e área ei.

Den Dunki manera den un bahada di serunan ku tabata sòru pa awa kore di e serunan i bin basha ei bou. Awendia no tin eseinan mas, ku tur e konstrukshonnan ku a tuma lugá. E área ei tabata riku na awa i esei por mira na e haltura di e palunan. Tur ta 6 meter bai mas haltu. I palu ku ta krese grandi asina ta pasobra e tereno tin awa den bòm. E tereno ei tabata un plantashon di fruta ku palunan di mango, watapana, palu di indju, palu di mespel, mansaliña den un palabra masha hopi palu ainda tin riba e tereno di Den Dunki.

Rais dushi kabei

Den Dunki por mira diferente rais koló hel riba tera. Ta trata aki di rais di dushi kabei. E palu aki tabata krese masha hopi i tabata un palu faborito pasobra por us’é pa diferente kos. Entre oro ta us’é pa traha mabi, pero tambe ta tinzja paña. E koló di kaki ta di e palu aki e ta bin. Tambe ta us’é pa traha muebel. Su koló ta asina bunita ku no tin mester di hasi masha kuné. I e ta saka un fruta ku tambe por kome. E no ta un palu asina famoso mas i asta pa traha mabi ta importá e ingredientenan. Den Dunki te ainda tin diferente palu di Dushi Kabei.

Mansaliña

Un di e palunan ku por haña henter un hòfi di dje den Dunki ta mansaliña. Por haña e fruta venenoso di mansaliña den kasi henter e parke. E ta e palu di mas venenoso na mundu i na Kòrsou tin masha hopi di dje. I p’esei na diferente parti di Kòrsou por haña kaminda e palu di mansaliña ta, teksto skibi pa e turista no ni mishi ku e frutanan asina bunita bèrdè, ku parse apel pero ku ta super venenoso.

Parke rekreashonal

Den Dunki a kòrda riba esnan ku ke sinta den fresku i laga e muchanan huntu i asta hasi un BBQ. Tin un parke rekreashonal den Dunki. E área ei ta spesialmente designá pa BBQ,ku banki i asta wep pa e muchanan.

Diferente pos

Den Dunki tin diferente pos. I nos a sera konosí ku vários di nan. Un di nan ku a hala nos atenshon tabata e pos di 8 huki. Famia Gorsira tin sufisiente sèn pa laga traha un Octa. I nan a preferá un di 8 huki i no un por rondó. E pos aki tabata pa alsa e bunitesa di e parke pasobra e parke aki tabata forma parti di nan kura.

Proseso pa traha pos

Si awe tin aparatonan moderno pa indiká unda tin awa pa koba pos, ántes esaki tabata sosodé manual.

Pa por a sa unda tin awa, tabata usa dos pida palu. Den tera tin energia i kanando ku e palu i ora e palu kontra otro einan tin awa. Anais a konta Djasabra ku riba tera

nos ta haña blachi tur kos ku ta akumulá riba otro. Bou di dje ta sigui e greis muhé, Esaki ta e greis fini ku por tene den man. Bou di e greis muhé ta e greis machu. Mester di tur dos. Bou di esei, kobando mas duru yega, ta haña man blou. Dikon man Blou?  Pasobra ora ta kobrando bo man ta bira blou. Ora yega man blou ta kere ku a yega fondo, pero mester kibra e man blou i den bòm ta haña e awa. Pa kibra e man blou mester pasa e proseso di sende kandela den fondo, lag’é bira kayente kayente i ta kuminsá lombra i ora e yega na e temperatura ei ta basha awa riba dje. Esei ta fri’e pa por sigui kobra den dje. I aki Anais a konta un ritual masha grasioso. Antes ora yega e man blou, promé ku yega na e awa ta baha un kabritu òf karné, prepará pa asina e awa spùit hasi un kòrtá chikí na e garganta di e bestia pa algun drùpel di sanger lèk. I ora e sanger sali ku e awa, e ta drei un rònchi rònt di e pos i ta saka e animal. Ta mat’é i einan ta fiesta tin.

Kalbas

Kòrsou konosé dos tipo di kalbas. Tin esun di mondi i esun di hòfi. Esun di mondi ta bira grandura di un bala di tènis i esun di hòfi tabata haña un grandura di un bala di futbòl. Esei tabata usa pa traha ponchera, skòter, tayo i esun di mondi tabata usa pa traha e famoso Gopi. E gobi ta manera un kèlki ku por bebe for di dje, dal un shòt. Tambe ta traha kuchara i fòrki for di e kalbas. I raton di anochi ta gusta e flor di e palu di kalbas. Meskos ku abeha ta hasi ku flor, esei e raton di anochi tambe ta hasi ku e flor di e palu di kalbas. Den dia e flor ta habri i for di dje ta sali kalbas. Pero e problema grandi ku tin ta ku si yuana pasa banda di e flor aki, lo no sali kalbas, pasobra nan ta kome.

     Otro siman nos tin mas di parke Den Dunki!      
     Den nos siguinte Edishon #Extradjasabra