WILLEMSTAD.- Riba dia di Banda Bou a duna homenahe ayera na Rutilio Rudy Rooi i a kambia e nòmber di Parke Himno i Banda Barber pa Parke Himno i Bandera Rutilio ‘Rudy” Rooi. Un bunita homenahe ku tabata un sorpresa pa Rudy mes.

Na e okashon aki, den presensia di promé minister Eugene Rhuggenaath i minister Zita Jesus-Leito a inougurá e nòmber i e mural ku pintura di Rudy Rooi ariba.

E mural ta dediká na Bándabou i na Rutilio Rudy Rooi i ta midi 14 meter largu i 5 meter hanchu. E ta representá diferente aspekto di bida kultural artístiko di Kòrsou.

Diferente tema di bida kultural di Kòrsou ta elaborá den e mural. E bandera di Kòrsou ta simbolisá e tema patriotismo, nos amor pa Kòrsou. Bon mirá e bandera ta brasa tur persona ku ta riba e mural. Nos bandera ta brasa, kuida, guia i protehá nos!

E tin aspekto di un flecha ku ta indiká; desaroyo, avanse, progresá, nos futuro!

Otro tema ku ta bini dilanti den e muraya artístiko aki ta nos flora i founa. Por apresiá e para trupial i e flor orkidia. Por mira e mural kara di un persona. E kara ta midi 4 meter. Ta kara di e persona asina stimá i apresiá na Kòrsou i prinsipalmente na Banda Bou ku ta duna homenahe ayera esta Rudy Rooi.

E dos muchanan ta refleho di e diferente aktividatnan kultural ku nos ta selebrá ku tantu goso i orguyo na Kòrsou. Ta referí aki na entre otro Seru i Karnaval, ku hustamente ta dos aktividat ku Rudy Rooi a stimulá, promové, karga, sostené i enrikesé ku hopi afan i dedikashon. Tambe e ta nifiká ku na kabuya ta bieu mester konopá kabuya nobo esta ku Rudy su hazañanan riba área kultural, mester inspirá hóbennan pa sigui ku e bon trabou. E dinámika entre Rudy i e muchanan ta simbolisá tambe e responsabilidat di grandinan pa hasi traspaso di nos kultura pa nos muchanan i hóbennan. Konektá pa kosecha.

Nos pais ta kompletamente rondoná pa laman, p’esei mes e kolo blou ultramarino ta resaltá. Blou ta tambe kolo di protekshon. Meta di e mural ta pa inspirá pueblo pa protehá e trabounan ku Rudy a bin ta desplegá pa Kòrsou i spesialmente e pueblo di Banda Bou. Sin duda e muraya artístiko aki ta yama atenshon. For di djaleu por atmirá su diferente komponentenan. Esei tabata nifikashon di e mural.