Minister Cooper a manda pidi akuerdo di benta ku FLOW

WILLEMSTAD.-Ta un tremendo dil a duna e kompania FLOW na momentu ku el a kumpra e kompania di telekomunikashon estatal UTS. No solamente FLOW a chèns oportunidat pa haña e kompania UTS i paga poko poko, pero tambe a mara komunidat na Kòrsou ku niun otro kompania no por drenta e merkado aki te 2022. Ta monopolio a duna FLOW den teblachi di plata! Ta p’esei e kompania por hasi i deshasí sin ku niun hende por hasi nada. Nan sa ku no por bini niun otro kompania pasobra nan tin monopolio te 2022. Na palabra parlamentario Elvin Gerard (PNP) ku a informa EXTRA di e desaroyo aki.

Parlamentario Gerard a duna di konosé ku minister Cooper ta na altura di e asuntu aki i ta di spera ku e minister lo por hasi algu. Gerard ku ta konosí komo defensor di Bándariba ta bisa ku e reklamonan kontra FLOW/UTS ta enorme ketu bai i e trata ku komunidat ta hañando ta simplemente inhustu. E kompania ta duna mal servisio i no tin niun hende ku por hasi nada.

Den komunikashon ku minister Cooper(MFK) el a splika ku el a manda pidi informashon rondó di benta di UTS hustamente pasobra tin hopi kos ku no ta kanando bon. E mandatario a komprondé ku durante negosiashon pa benta gobièrnu lo a palabra ku durante di 3 aña gobièrnu lo no por duna konseshon di telekomunikashon na niun otro kompania pa kompetí ku FLOW. E minister a kuminsá haña informashon pero el a indiká na EXTRA ku e loke e ke mira spesífikamente ta e akuerdo di benta. Ta den e akuerdo di benta e ke mira si ta bèrdat e minister anterior di VVRP a duna monopolio na FLOW ku durante di sierto kantidat di aña no por duna niun konseshon na otro kompanianan i na di dos lugá minister Cooper ke wak den e akuerdo di benta si bèrdat a palabra ku skolnan lo haña internèt pòrnada pasobra te ainda esei no a sosodé.