WILLEMSTAD.-Parlamento di Kòrsou a kaba di aprobá kredensialnan di e persona ku ta bai drenta e kolegio despues ku Elsa Rozendal a entrega su retiro komo parlamentario pa partido MAN. E reunion a habri sin problema ya ku frakshon di MFK a duna sosten pa forma kuórem.

Awe mainta presidente di Parlamento sra. Ana Maria Pauletta a forma un komishon ku mester a investigá si e kredensialnan di Yves ‘Payo’ Schoop ta korekto pa asina e por drenta Parlamento. E komishon a keda formá pa Yael Plet (MAN) komo presidente, Walroud (PAR) i Gilbert Doran (MFK). Na final di nan tarea e presidente di e komishon sr. Plet a duna relato na Parlamento ku tur kos ta na òrdu i komo tal ta rekomendá pa permití Yves Schoop drenta Parlamento despues di a huramentá serka su ekselensia gobernador di Kòrsou. Presidente sra. Pauletta a bisa ku awor Parlamento lo informá gobernador i presidente di Konseho Supremo Elektoral miéntras ta pendiente huramentu serka gobernador.