WILLEMSTAD.- Parlamento di Kòrsou ayera a vota pa e proyekto di lei pa redusí 12.5 porshento di kondishon di labor di ámtenar. El a wòrdu aprobá ku 11 voto pro i 5 voto kontra. Ku esaki e proyekto di lei a keda aseptá dor di Parlamento. Ku ta nifiká ku ámtenarnan lo no haña un pago di fakansi i tambe lo tin redukshon di nan dianan di fakansi. Esaki lo konta, ku forsa retroaktivo, for di 1e di yüli 2020. For di 1e di yanüari 2021 ámtenarnan lo no haña un oumento di ‘bezoldiging’.
Esaki ta konta pa tur ámtenar, gelijkgestelden, esnan den N.V., fundashon i otro personanan pa kual e e areglo tambe ta konta pe.
Minister di Maneho, Planifikashon i Servisio Armin Konket a splika ayera durante reunion públiko di parlamento ku gabinete-Rhuggenaath ku e proyekto di lei ta kumpli ku un eksigensia ku Hulanda a buta.
Konket tambe a reakshoná riba remarke di parlamentario Meindert ‘Menki’ Rojer. Rojer a bisa ku debí na e forsa retroaktivo di e medida ámtenarnan lo pèrdè 25 porshento na komienso di yanüari i no 12.5 porshento. Konket: ‘E mihó manera ku mi por kontestá e pregunta, òf pa klara e inklaridat ku sr. Rojer ta krea, ta si kada ámtenar ta wak su slep di salario.’ Konket ta splika ku den e lunanan di yüli te desèmber di e aña aki e ámtenar no a mira niun diferensia den su slep di salario. Konket: ‘Na yanüari próksimo tampoko nan lo mira kambio. Febrüari, Mart, Aprel, Mei sigui bai ariba tampoko nan lo mira diferensia den nan slep di salario. Lokual ku nan lo nota ta ku den luna di yüli lo no tin sobresuèldo di fakansi. Anto nan lo ripará tambe ku e kantidat di ora ku nan tin derechi riba pa loke ta fakansi ta keda redusí ku 24 ora pa aña. Ku ta nifiká tres dia di trabou pa aña.’ Konket: ‘Pues en bes di bai den diskushon ku sr. Rojer esaki ta e mihó manera pa nos por trese klaridat. Tur hende pasenshi, warda bo slep di salario. Bo lo ripará ku nada lo pasa kuné, no bai atras. Uniko kos ku lo kambia, segun e minister, ta ku lo no tin ‘vakantiegeld’ i e 24 ora di fakansi pa aña lo tin ménos. Banda di esei e loontrede entrante 1e di yanüari 2021 lo no ta e kaso mas tampoko.’