WILLEMSTAD.- Riba inisiativa di frakshon di partido MAN, parlamento a hasi un petishon por eskrito na presidente, Charetti America-Francisca pa reuní awe ku Orden di Abogado promé ku trata di e lei di LOK (“Landsverordening Online Kansspelen”). Esaki ta promé ku bolbe trata e lei di LOK den Komishon Sentral di parlamento.
Orden di Abogado ta di opinion ku mester skrap e kondishon stipulá den e lei ku abogadonan ku ta duna servisio na kompanianan di “online gambling” mester pidi un sertifikado serka Curaçao Gaming Authority (CGA). Tin opheshon serio kontra loke ta stipulá den artíkulo 15.7 insiso 1 di e konsepto di lei di LOK ku ta na parlamento.
Den un karta di 29 aprel último pa parlamento ta duna splikashon amplio riba e opheshonnan. For di 2023 e órden di abogado a reklamá ku den e konsepto di lei di LOK ta introdusí akreditashon obligatorio pa abogadonan.
Despues di esaki minister di Finansa a kambia e teksto di e lei i ta referí awor na “sertifikashon” boluntario. E sertifikashon aki ta mará na algun kondishon.
Esun ku ta pidi pa haña sertifikashon mester disponé di e konosementu, eksperensia i kalidatnan pa ofresé servisio òf produktonan pa kua ta pidi un sertifikado. CGA por determiná kriterionan adishonal pa loke ta e konosementu, eksperensia, kalidat i reportahenan pa ofresé servisio òf produktonan pa kual ta pidi un sertifikado pe.
Ku otro palabra esun ku ta pidi un sertifikado ta someté na supervishon di parti di CGA a base di e kondishonnan ku tin òf ku por stipulá despues a base di maneho ku ta pone pa bini na remarke pa un sertifikado.
Abogadonan sinembargo ta kai kaba bou di supervishon di Korte Komun, Hunta di Supervishon riba Abogasia (“Raad van Toezicht op de Advocatuur”) i Hunta di Apelashon riba Abogasia (“Raad van Appèl op de Advocatuur”). Segun Orden di Abogado e supervishon aki ta funshoná bon.
“Supervishon di CGA riba abogadonan ku un sertifikado no ta nesesario i lo por krusa e supervishon eksistente. Kon CGA ta disidí riba abogadonan ku Hunta di Supervishon a tuma un medida kontra dje? Kontrali, Hunta di Supervishon mester tene kuenta ku desishonnan di CGA riba abogadonan?”
Tambe Orden di Abogado ta puntra su mes si mester tin kordinashon entre e diferente supervisornan. “Si e kontesta ta si, mester sòru ku tin sierto garantianan den e kordinashon aki. E konsepto di lei di LOK no ta stipulá nada riba esaki.”
Orden di Abogado ta yega pues na e konklushon ku sertifikashon di abogadonan ta krea desigualdat bou di abogadonan ku ta hasi e mesun trabou. E ta impliká ku un abogado ku un sertifikado ya kualitativamente mihó ku un abogado sin sertifikado. Un otro efekto por ta ku abogadonan sin sertifikado ta haña ménos trabou.
Notabel ta ku abogadonan di un kontrapartido di un kompania ku tin un lisensia, por ehèmpel abogado di CGA òf di un kliente di un kompania di “online gambling”, no ta bin na remarke sertifikado kaminda nan ta duna e mesun servisio hurídiko. Orden di Abogado ta puntra tambe si e legisladó ta sali for di e punto di bista ku abogadonan di kontrapartidonan outomátikamente ta disponé di e konosementu, eksperensia i kalidatnan nesesario. “E posibel desigualdat ku dunamentu di sertifikado ta trese ku kuné bou di abogadonan no ta deseabel. Sertifikashon ta kontra seguridat hurídiko.”
Un abogado òf kualke otro dunadó di servisio ku sertifikado ku someté su mes na supervishon di CGA no por kiko e konsekuensianan di esaki lo ta despues ku a haña un sertifikado. Esaki ta krea tera fértil pa abusu di poder i arbitrariedat, Orden di Abogado ta bisa.
