Minister Hato; GMN a lanta un tim ku ta bai atendé

WIILLEMSTAD.-Parlamento di Kòrsou a atendé tambe ku e problema di kachónan ku ta kana riba kaya den un ‘vragenuurtje’. Minister Shalten Hato di hustisia a splika ku tin but di 5 mil florin pa doño di kachó peligroso no registrá ku kousa daño. Den kaso ku kachó peligroso morde hende òf kousa daño Ministerio Publiko por duna òrdu mesora pa pone e kachó drumi. Den e parti sivil por eksigí daño i perhuisio di doño di e kachó.

E problema di kachónan ku ta kana los riba kaya ta hopi grandi. Tin un tim ku ministerio di Salubridat, Medio Ambiente i Naturalesa lanta pa atendé ku e problema aki. Tin polisnan di bario ku tin outoridat pa atendé ku e problemanan aki den kada bario. E minister a bisa ku e ta orguyoso di Kuerpo Polisial ku ta trahando duru i ta kompilá tur informashon di manera ku por hiba maneho a base di informashon konkreto. Polisnan ta atendiendo kasonan di hòrtamentu di kabritu i tambe di bakanan ku ta kana los i kousa daño.

Ki dia ta kuminsá ku akshon pa kita kachónan ku ta kana riba kaya? Ta pregunta di parlamentario Carolina. Tin 4 pa 5 mil kachó ta kana riba kaya i te ainda no a pone komo prioridat pa atendé kuné. Ki dia gobièrnu ta asumí su responsabilidat. E lei di bienestar di animal ta bisa bon kla ku mester atendé ku kachónan ku ta kana riba kaya. Ki dia Kuerpo Polisial ta pone komo prioridat, ta pregunta di parlamentario McWilliam.

Minister Hato ta lamentá ku ta bisa ku Kuerpo Polisial no ta hasi nada pa atendé problema di kachónan ku ta kana riba kaya. Ministerio GMN a lanta un tim spesial pa atendé ku e problema aki.