WILLEMSTAD,- A konvoká un reunion públiko di parlamento di Kòrsou pa djaluna 16 di yanüari. Riba agènda di reunion, fuera di ‘ingekomen stukken, tin dos punto. E promé punto ta eskoho di presidente di Parlamento’, e otro punto ta ‘Presentashon di Gobièrnu i deliberashon ku
Gobièrnu enkuanto e akuerdo di gobernashon
2016-2020 “Dignidat humano ta sentral”.
Manera ta konosí partidonan di koalishon a yega na un akuerdo pa parlamentario pa partido MAN Giselle Mc William lo bira presidente di Parlamento. Esaki por tuma lugá djaluna awor. Mc William a splika na EXTRA algun dia pasá ku e ta kere ku e nombramentu lo tuma lugá den e próksimo reunion públiko di Parlamento. Te e momentu ei Humphrey Davelaar ta presidente di Parlamento.
Dia 4 di yanüari, na final di un reunion ku a kuminsá sumamente kaótiko, a nombra Marilyn Alcalá-Wallé komo vise-presidente di Parlamento. Despues a plania un reunion riba dia 6 di yanüari ku mesun tópiko riba agènda ku ta riba agènda di e reunion di djaluna 16 di yanüari. E reunion a keda posponé despues di un proposishon di parlamentario Gerrit Schotte pa hasi esaki. Schotte huntu ku 8 otro parlamentario a puntra pa un reunion pa deliberá ku minister-presidente Hensley Koeiman tokante akuerdo di gobernashon
2016-2020 “Dignidat humano ta sentral”. E topiko tabata riba agènda di 6 di yanüari komo proposishon di e nuebe parlamentario di oposishon; pa reunion di 16 di yanüari esaki no ta menshoná mas.