WILLEMSTAD.- Komishon fiho di Enseñansa, Siensia, Kultura i Deporte di parlamento di Kòrsou djaluna último a deliberá ku “Foundation Fair Educational Chance (FFEC)” i Universidat di Kòrsou enkanto e resultado di e investigashon “Belasting van Ouders met kinderen in het funderend Onderwijs op Curaçao”. Na nòmber di FFEC dr. Odette van Brummen-Girigori tabata presente i na nòmber di universidat, dr. Francis de Lanoy.
Manera ta konosí minister di Enseñansa, Siensia, Kultura i Deporte Sithree van Heydoorn mas ku dos luna pasá a manda e rapòrt di investigashon tokante e peso di mayornan na Kòrsou ku tin yu(nan) den enseñansa di fundeshi, pa Parlamento. Van Heydoorn a hasi esaki ‘mirando e importansia di e resultadonan’.
E investigashon a mustra na un manera sistemátiko kuantu peso e mayornan ta eksperensiando guiando nan yu(nan) hùiswèrk, kua ta e problemanan ku nan ta eksperensiá i kon tur esaki ta relashoná ku e bienestar di mayornan.

Van Brummen-Girigori di FFEC i De Lanoy a duna un presentashon na komishon di parlamento.
E resultadonan di e investigashon ta mustra ku mayornan promedio ta dediká hopi tempu na guia di nan yu(nan) ku trahamentu di trabou di skol (hùiswèrk, preparashon pa pruebanan). Nan ta un promedio di 2.2. ora pa dia okupá ku guia di hùiswèrk di nan yu(nan).
Relashoná ku investigashon tokante e peso di mayornan, Van Brummen-Girigori a duna diferente rekomendashonnan na komishon di Parlamento. Entre otro pa evaluá kuríkulo. Van Brummen-Girigori: “Lo tin sentido pa skolnan evaluá nan kuríkulo krítikamente. Kiko presis ta pone ku ta nesesario pa alumnonan mester hasi asina tantu na kas? Esaki ta realmente nesesario?”
Un otro rekomendashon ta pa sòru pa hùiswèrk kualitativamente mihó. “Ideal lo tabata si skolnan por duna alumnonan ménos hùiswèrk, pero kualitativamente mihó.”
Un otro rekomendashon segun e investigadó ta pa yuda alumnonan siña di un forma ku nan mes ta regulá nan mes. “Ta rekomendá fuertemente pa siña alumnonan kon nan por siña regulando nan mes.” Tambe Van Brummen-Girigorie a duna komo rekomendashon pa sostené mayornan. “Mayornan mes nò tur biaha tin e konosementu òf abilidatnan pa guia un mucha optimalmente ku hùiswèrk. Skolnan no mester asumí di mes ku mayornan tin esaki.”