WILLEMSTAD.- Ayera ku 17 voto pro i 1 blanku, parlamentu a bai di akuerdo pa prolongá periodo di Ombudsman (Defensor di Pueblo) sr. Keursly Concincion ku 6 aña mas. Pero loke a hala atenshon ta ku e vise presidente di Raad van Advies a manda un karta bastante basta pisá dikon Raad van Advies lo no partisipá den e komishon pa nombramentu di un Ombudsman.

Presidente di parlamentu, sra. Charetti America-Francisca a splika ku sr. Concincion a asumí e kargo di Ombudsman na òktober 2015. Parlamentu di Kòrsou a nombra sr Concincion komo defensor di pueblo, pa un periodo di 6 aña konforme lei. Sr. Concincion a asumí e enkargo di Ombudsman 27 òktober 2015 pues e termino aktual ta terminá 27 di òktober próksimo.

Den un karta fechá di desèmber 2020, Ombudsman a hala atenshon di parlamentu riba e periodo ku lo terminá 27 òktober 2021. E parlamentu ku a sinta te mei di e aña aki no a tuma un desishon pa ku kontinuidat di e instituto despues di e periodo ku ta terminá 27 òktober 2021. Ora e parlamentu aki a sinta, e tema aki a subi mesa.

E komishon enkargá ku asuntunan doméstiko a konsehá presidente di parlamento pa hiba un kombersashon riba e tema aki ku Ombdusman. Dia 5 yüli 2021, presidente huntu ku griffier a papia ku Ombudsman tokante e tema aki i a palabrá ku Ombudsman lo manda un karta pa parlamentu pa indiká su posishon relashoná ku un eventual periodo mas despues di òktober 2021.

Parlamentu a risibí karta di Ombudsman 5 di yüli 2021 den kual e ta hasi petishon pa un reunion ku parlamentu den kual ta deliberá tokante e instituto i kon pa fortalesé esaki i pe hasi su tareanan. Tambe parlamento a manda un karta 8 yüli 2021, den kual Ombudsman ta bolbe hala atenshon dje periodo ku ta kabando i ta urgi parlamentu pa tuma un desishon al respekto. Sea dor di inisiá un proseso pa reklutá un funshonario nobo pa e puesto di Ombudsman òf prolongá e aktual funshonario.

Ku e karta aki di un forma implísito, sr. Concincion a duna di konosé ku e ta para pa un periodo nobo. Dia 12 di ougùstùs 2021 parlamentu a reuní ku sr. Concincion. Algun miembro a puntra e posishon spesífiko di sr Concincion pa un periodo nobo, i riba kual sr. Concincion a bisa ku e ta para habri pa esaki.

Entre tantu parlamento pa medio di griffier a aserka e instansianan ku lei ta menshoná ku mester forma un komishon pa inisiá e proseso pa reklutashon di un Ombudsman nobo. Den e komishon aki tin presidente di Korte, Kontrolaria General, i e vise presidente di Raad van Advies. Raad van Advies a informá parlamentu ku e vise presidente lo no forma parti di e  komishon menshonando vários motibu pa e desishon aki. A base di tur e desaroyonan aki, e presidente a aserka lidernan di frakshonnan den parlamentu pa sinti kiko ta biba serka e diferente frakshonnan pa ku e tema aki. E por konkluí ku parlamentu ta sinti pa prolongá e periodo di e defensor di pueblo. P’esei a someté e desishon na votashon ku e resultado ariba menshoná. Parlamentu a otorgá e periodo di sr. Concincion komo Ombudsman pa e periodo despues di 27 òktober 2021 te 27 òktober 2027.

E presidente a bisa ku el a pidi e komishon di prosedimentu di parlamentu pa traha riba un proposishon kon pa atendé ku e opheshonnan ku Raad van Advies tabatin pa no forma parti di e komishon ku ta presentá un kandidato.

Sr. Fergino Brownbill presidente di e komishon a bisa ku parlamentu lo saka un karta basta fuerte den direkshon di sra. Dindial, vise presidente di Raad van Advies, pasobra ta un órgano ku ta husga lei, i awor nan mes ta bai kontra di lei. Pa lei Raad van Advies tambe mester forma parti dje komishon di nombra Ombudsman. “Nos lo manda un karta basta serio p’e”, Brownbill a indiká.