WILLEMSTAD.- Awor pueblo di Kòrsou por sigui reunionnan di parlamentu na su mes radio emisora 102.5FM. Riba 10-10-10, parlamentu a hasi e anunsio ku for di e dia ei a kuminsá ku e periodo di tèst e frekuensia di radio di Parlamentu a traves di e emisora 102.5 FM. Durante di e periodo di tèst, por sigui reunionnan di Parlamenu riba e frekuensia akí. Parlamentu ta rekordá pa tene kuenta ku nan ta den e fase di tèst.

Parlamentu den luna di ougùstùs último a anunsiá ku entrante 15 di ougùstùs 2025, no por sigui reunionnan di Parlamentu di Kòrsou mas via di emisoranan komersial. Pasobra esaki a stòp entrante 14 di ougùstùs. Pues, entrante dia 15 di ougùstùs komunidat por sigui e reunionnan di Parlamentu únikamente via di e wèpsait di Parlamentu i e paginá di Facebook di Parlamentu, ‘Parlamento di Kòrsou’.

Tabata e komishon di asuntunan doméstiko ku a disidí ku parlamento lo tin su radio propio. Lo usa e emisora pa parlamentarionan por ehersé un otro ròl ku nan tin, esta, prepará komunidat pa komprendé pasonan demokrátiko ku ta tuma lugá den pais. Tambe e parlamentarionan lo splika kiko nan balor agregá ta pa e siudadano i kiko elekshon ta nifiká pa e votadó. Departamento di komunikashon i protokòl tin di traha riba kontenido di e programashon dje radio.

Te ku resien tabata hasi uso di emisoranan radial komersial pa transmití e reunionnan. Pero awor parlamentu tin su propio radio.