WILLEMSTAD.- Un partera ta bai korte kontra di e desishon di ministerio di Salubridat, medio ambiente i naturalesa (GMN), pasobra ta nenga e partera di habri su propio konsultorio. Segun e partera e desishon di GMN pa prohibié di habri un konsultorio no por keda para, pasobra e maneho ku GMN ta indiká di a apliká, no ta eksistí. E maneho aki pa kolmo a keda konfirmá dor di minister di GMN den dokumentonan pa korte.
Den e manehonan ku gobièrnu a entregá na Korte, niun kaminda tin pará ku no ta posibel pa un partera por traha riba su mes, i ku tur partera mester solisitá serka Fundashon Duna Lus/Kraamkliniek i ku nan ta kai bou di e instansia aki. E úniko konklushon ku tin den e kaso aki ta ku e petishon di e partera i e maneho di GMN a ser komprondé robes.
Otro for di loke ku minister ta pretendé, e petishon di e partera no ta pa start un sentro di “Kraam” nobo. Ta bai solamente pa e por haña eksonerashon pa por ehersé su funshon den un konsultorio. P’esei e alegashon di gobièrnu ku ta p’esei e ta bai habri un konsultorio no ta kuadra. Pasobra pa e por habri un sentro di “kraam” nobo e partera lo mester haña un otro pèrmit.
Si bai duna e partera eksonerashon nunka por ta enkontra di e maneho di gobièrnu, manera minister a alegá. Al kontrario e loke ku e partera ta pidi hustamente ta yuda e sektor. Pasobra e tin un bon kolaborashon i ta aktivo na Kraamkliniek. Ademas asina e haña e eksonerashon, mesora e lo firma un akuerdo di kolaborashon ku Kraamkliniek.
E partera ta konkluí i ta pidi korte pa deklar’é e desishon di gobièrnu nulo, paso loke defensa di gobièrnu a trese dilanti ta en kontra di e prinsipio di motivashon. Tambe e partera ta pidi korte pa ordená gobièrnu pa tuma un desishon nobo riba su petishon.