WILLEMSTAD.- Polis ta informá ku awe nochi 11 or te ku mayan mardugá 2 or parti di brùg Juliana ta sera.  Referiendo na e Dekreto di Tráfiko fechá 12 di novèmber 2024 enkonekshon ku un filmashon ku lo tuma lugá entre djamars 12 di novèmber 2024 alrededor di 11 or di anochi i djárason 13 di novèmber 2024 alrededor di 2 or di mardugá, Brùg Juliana lo ta será den e direkshon di Punda pa bai Otrobanda pa tráfiko motorisá durante di e orario ariba menshoná.

Esaki ta enserá ku pa 11 or di anochi lo sera Romulo Betancourt Boulevard na altura di Konsulado Venezolano i durante di e orario ei tur tráfiko motorisá den direkshon di Brùg Juliana, lo keda desviá den direkshon di Fort Nassauweg.

Pa awe 11 or di anochi lo no permití tráfiko motorisá tampoko for di Abraham Mendez Chumaceiro Boulevard den direkshon di Brùg Juliana. E tráfiko lo keda desviá den direkshon di Romulo Betancourt Boulevard. Solamente vehíkulonan di polis, ambulans i brantwer ta ser pèrmit.

Ta pidi tur shofùr di vehíkulonan motorisá pa tene kuenta ku e partikularidat aki i ta gradisí di antemano pa e komprenshon.